Category: Zaburi

Kwiringira Uhoraho mu gihe cy’akaga

1 Zaburi y’umuyobozi w’abaririmbyi. Ni iya Dawidi.

2 Uhoraho, ni wowe mpungiraho,

ntugatume nigera nkorwa n’ikimwaro,

unkize ushingiye ku butungane bwawe.

3 Ntega amatwi utebuke undengere,

umbere urutare runkingira,

umbere n’ubuhungiro ntamenwa, unkize.

4 Koko umbereye urutare n’ubuhungiro ntamenwa,

girira izina ryawe unjye imbere unyobore.

5 Uzategura umutego banteze,

koko uri ubuhungiro bwanjye.

6 Uhoraho Mana y’ukuri, nishyize mu maboko yawe,

koko ni wowe uzancungura.

7 Nanga abayoboka ibigirwamana,

Uhoraho, ni wowe niringira,

8 nzajya nezerwa nishimire ubuntu ungirira,

koko wabonye imibabaro yanjye,

umenya intimba inshengura umutima.

9 Ntiwampanye mu maboko y’umwanzi,

watumye nshinga ibirenge ndishyira ndizana.

10 Uhoraho, ngirira impuhwe kuko ndi mu kaga,

kubera agahinda mu maso hanjye harasuherewe,

umubiri wanjye n’umutima wanjye na byo byarashegeshwe.

11 Koko imibereho yanjye ni imiruho misa,

amaganya anshajishije imburagihe,

nzahajwe n’ibicumuro nakoze,

ingingo zanjye na zo zirarekanye.

12 Abanzi banjye batuma ntukwa,

abaturanyi banjye na bo bakandushiriza.

Abasanzwe banzi barantinya,

abo duhuye bakanyitaza.

13 Nibagiranye nk’uwapfuye,

meze nk’igikoresho kitagifite umumaro.

14 Numva abantu benshi bamvuga nabi,

hirya no hino bakanshyiraho iterabwoba.

Bishyira hamwe bakandwanya,

barangambanira ngo banyice.

15 Ariko Uhoraho, ni wowe niringira,

ndavuga nti: “Uri Imana yanjye!”

16 Ibizambaho ni wowe ubigenga,

ngaho nkiza abanzi n’abantoteza.

17 Umugaragu wawe undebane impuhwe,

unkize kubera imbabazi zawe.

18 Uhoraho, ninkwambaza ntuntamaze,

abagome abe ari bo bamwara,

bapfe bashyirwe ikuzimu.

19 Abo babeshyi ubacecekeshe,

ubacecekeshe kuko basebya intungane,

bayirataho bakayituka ndetse bakayisuzugura.

20 Mbega ukuntu ubuntu ugira ari bwinshi!

Ubugenera abakubaha,

abaguhungiraho mu ruhame rwa rubanda.

21 Ubahozaho ijisho ukabarinda,

ubarinda ubutiriganya bw’abantu,

ubahungisha ababavuga nabi.

22 Uhoraho nasingizwe,

nasingizwe kuko yangiriye ubuntu akandinda,

ineza yangiriye imbera nk’umujyi ntamenwa.

23 Nari narihebye ndavuga nti:

“Uhoraho ntakinyitaho!”

Nyamara Uhoraho, ubwo nagutakiraga,

naragutakambiye urangoboka.

24 Mwa ndahemuka z’Uhoraho mwe, nimumukunde mwese!

Erega Uhoraho yita ku ntore ze,

naho abirasi bo akabahana yihanukiriye!

25 Mwa biringira Uhoraho mwese mwe,

nimukomere kandi muhumure.

Amahoro aterwa no kubabarirwa

1 Igisigo gihanitse cya Dawidi.

Hahirwa umuntu Imana yababariye ibicumuro,

ikamuhanaguraho ibyaha bye.

2 Hahirwa umuntu Uhoraho atabaraho ubugome,

ntagire uburiganya muri we.

3 Iyo ntemeraga icyaha nakoze nacikaga intege,

nirirwaga nganya bukira.

4 Uhoraho, ijoro n’amanywa numvaga umbangamiye,

imbaraga zanshiragamo nkaraba nk’uruyuzi rwo mu cyi.

Kuruhuka.

5 Naravuze nti:

“Reka ibicumuro byanjye mbibwire Uhoraho.”

Uhoraho, nakweruriye icyaha nakoze,

sinaguhishe amafuti yanjye.

None nawe wampanaguyeho icyaha nakoze.

Kuruhuka.

6 Abayoboke bawe bose nibajye bagutakambira mu gihe gikwiye,

akaga kameze nk’amazi ahurura ntikazabageraho.

7 Uhoraho, uri ubwihisho bwanjye undinda amakuba yose,

nzakuririmba kuko wangobotse ukankiza.

Kuruhuka.

8 Uhoraho ati: “Nzakwigisha nkwereke inzira ukwiye kunyura,

nzakugira inama nkwiteho.

9 Ntukagire ubwenge buke nk’ifarasi n’inyumbu,

zumvira ari uko zihaswe n’imikoba iziritse ku twuma two mu minwa yazo.”

10 Abagome bagondamirwa n’amagorwa menshi,

ariko abiringira Uhoraho abahundazaho imbabazi ze.

11 Mwa ntungane mwe, nimwishime munezererwe Uhoraho!

Mwa bafite umutima uboneye mwese mwe,

nimuvuze impundu.

Gusingiza Imana Rurema

1 Mwa ntungane mwe, nimuvugirize Uhoraho impundu.

Koko birakwiye ko abafite umutima uboneye bamusingiza!

2 Nimuhimbaze Uhoraho mucuranga inanga nyamuduri,

nimumuririmbe mucuranga inanga y’indohay’imirya icumi.

3 Nimumuririmbire indirimbo nshya,

murangurure mucurangane ubuhanga buhanitse.

4 Ibyo Uhoraho avuga biraboneye,

ibyo akora byose ni ibyo kwizerwa.

5 Uhoraho akunda ubutungane n’ubutabera,

ineza ye yuzuye isi yose.

6 Uhoraho yavuze ijambo ijuru ribaho,

yahumetse umwuka inyenyeri zikwira ijuru.

7 Yagomeye amazi ahinduka inyanja,

inyanja ziba ibigega by’amazi maremare.

8 Abantu bose nibatinye Uhoraho,

abatuye isi bose nibamwubahe.

9 Koko yaravuze isi iraremwa,

ategetse ibintu byose bibaho.

10 Uhoraho apfubya imigambi mibi y’amahanga,

ibyo abayatuye bagambiriye abiburizamo.

11 Ariko imigambi y’Uhoraho ntivuguruzwa,

ibyo agambiriye bihoraho uko ibihe bihaye ibindi.

12 Hahirwa ubwoko bufite Uhoraho ho Imana,

hahirwa Abisiraheli kuko yabitoranyirije.

13 Uhoraho yitegereza ari mu ijuru,

aritegereza akabona bene muntu bose,

14 aho ari aganje aritegereza,

aritegereza akabona abatuye isi bose.

15 Bose ni we wabaje imitima yabo,

yita ku bikorwa byabo byose.

16 Ingabo nyinshi si zo zituma umwami atsinda intambara,

imbaraga nyinshi si zo zituma intwari icika ku icumu.

17 Kwiringira amafarasi y’intambara nta cyo bimaze,

imbaraga zayo nyinshi si zo zirokora umuntu.

18 Nyamara Uhoraho yita ku bamwubaha,

yita ku biringira imbabazi ze,

19 abakiza urupfu,

mu nzara atuma baramuka.

20 Twebwe twiringira Uhoraho,

ni we udutabara akatubera ingabo idukingira.

21 Ni we udutera kwishima,

turamwizera kuko ari umuziranenge.

22 Uhoraho, ujye utugirira imbabazi,

koko ni wowe twiringira.

Ineza y’Uhoraho

1 Zaburi ya Dawidi. Yayihimbye igihe yisarishaga imbere y’Umwami Abimeleki, maze Abimeleki aramwirukana Dawidi arigendera.

2 Nzasingiza Uhoraho ubutitsa,

nzamuhimbaza ubudahwema.

3 Nzirata ibyo Uhoraho yakoze,

abicisha bugufi nibanyumva bishime.

4 Nimucyo duheshe Uhoraho ikuzo,

twese hamwe dufatanye kumuhimbaza.

5 Natakambiye Uhoraho aranyumva,

ankiza ibyo natinyaga byose.

6 Abamurangamira barabagirana mu maso,

ntabatamaza ngo bamanjirwe.

7 Jye nagize ibyago ntakambira Uhoraho aranyumva,

yankijije amakuba yanjye yose.

8 Umumarayika w’Uhoraho ashinga ibirindiro,

abishinga ahazengurutse abubaha Uhoraho akabakiza.

9 Nimusogongere mwumve uko Uhoraho agira neza,

hahirwa umuntu umuhungiraho.

10 Mwa biyeguriye Uhoraho mwe, nimumwubahe,

koko abamwubaha ntibagira icyo babura.

11 Intare zishobora gusonza zikabura ibyo zirya,

nyamara abatakambira Uhoraho nta cyo babura.

12 Mwa bana mwe, nimwigire hino mwumve,

mbigishe uko mukwiye kubaha Uhoraho.

13 Yewe muntu ushaka ubugingo,

ukifuza kurama ugatunga ugatunganirwa,

14 ufate ururimi rwawe we kuvuga ibibi,

ufunge n’umunwa wawe we kubeshya.

15 Zibukira ibibi ukore ibyiza,

ushakashake amahoro uyaharanire.

16 Uhoraho ahoza ijisho ku ntungane,

atega amatwi akumva icyo zisaba.

17 Uhoraho arwanya inkozi z’ibibi,

arazitsemba zikibagirana burundu.

18 Nyamara abatakambira Uhoraho arabumva,

abakiza amakuba yabo yose.

19 Uhoraho agoboka abafite intimba ku mutima,

ahoza abashenguwe n’agahinda.

20 Intungane yibasirwa n’ibyago byinshi,

ariko Uhoraho abiyikiza byose.

21 Akomeza ingingo z’umubiri wayo,

nta gufwa ryayo na rimwe rivunika.

22 Umugome azapfa azize ubugome bwe,

abanga intungane bazacirwaho iteka.

23 Uhoraho acungura abagaragu be,

abamuhungiraho bose ntazabaciraho iteka.

Intungane isaba kurenganurwa

1 Zaburi ya Dawidi.

Uhoraho, mburanira n’abamburanya,

urwanye abandwanya.

2 Fata ingabo nini n’into,

uhaguruke untabare.

3 Karaga icumu ukumire igitero kinyirukanye,

umpumurize uti: “Ndagukiza.”

4 Abahagurukiye kunyica nibamware bakorwe n’isoni,

abangambanira bakimirane bafite ipfunwe.

5 Uhoraho, batumure nk’umurama utumurwa n’umuyaga,

umumarayika wawe abirukankane,

6 inzira yabo ibe icuraburindi kandi inyerere,

umumarayika wawe abakurikirane abahashye.

7 Banteze umutego nta mpamvu,

bantega urwobo bampora ubusa.

8 Icyago cya kirimbuzi kibagwe gitumo,

umutego banteze ubashibukane,

bashirire mu rwobo bancukuriye.

9 Ubwo ni bwo nzanezerwa cyane,

nishimire ko Uhoraho yankijije.

10 Nzabwira Uhoraho mbikuye ku mutima nti:

“Nta wuhwanye nawe!

Abanyamibabaro ubakiza ababarusha amaboko,

abanyamibabaro n’abakene ubakiza ababarya imitsi.”

11 Abanshinja ibinyoma barampagurukiye,

banshinje ibyo ntigeze nkora.

12 Nabagiriye neza banyitura inabi,

none ndi mu bwigunge nk’incike.

13 Nyamara iyo bo babaga barwaye,

nambaraga umwambaro ugaragaza akababaro,

nicishaga bugufi nkigomwa kurya,

nkabasabira nubitse umutwe.

14 Nakubitaga hirya no hino,

nkamera nk’urwaje incuti cyangwa umuvandimwe,

nubikaga umutwe nkarira nkaho ari mama wapfuye.

15 Ariko iyo ngize ibyago baraterana bakishima,

bankoraniraho ntabizi bakangirira nabi,

biha kunsebya ubutitsa.

16 Barankwena nk’abasekēra igicumba,

barampekenyera amenyo.

17 Nyagasani, uzandebēra ugeze ryari?

Dore banyasamiye nk’intare,

umvane mu menyo ya rubamba.

18 Nzagushimira mu ikoraniro rinini ry’abayoboke bawe,

ngusingize mu ruhame rw’imbaga nyamwinshi.

19 Abanyanga nta mpamvu ntibakanyishime hejuru,

abanyangira ubusa ntibakandyanirane inzara.

20 Nta jambo ry’amahoro bavuga,

bahimba ibinyoma bakabeshyera abanyamahoro batuye igihugu.

21 Banshinyikira amenyo bavuga bati:

“Yee! Yee! Yee! Twarakwiboneye!”

22 Ariko Uhoraho, uzi uko byagenze ntubyihorere,

Nyagasani, ntuntererane!

23 Nyagasani Mana yanjye undenganure,

uhaguruke umburanire.

24 Uhoraho Mana yanjye, undenganure kuko uri intungane,

abanzi banjye be kunkina ku mubyimba.

25 Be kwirya icyara bati:

“E! E! E! Tugeze ku cyo twashakaga,

dore tumunyujije mu ryoya!”

26 Abishimira ko nagize ibyago bose nibamware bakorwe n’isoni,

abishyira hejuru bakanshungēra bagire ipfunwe bamware.

27 Ariko abishimira ko narenganuwe nibavuze impundu banezerwe,

nibahore bavuga bati: “Uhoraho nakuzwe,

we wishimira ko umugaragu we agira amahoro.”

28 Nanjye nzajya ntangaza ubutungane bwawe,

njye ngusingiza umunsi wire.

Ubugizi bwa nabi bw’abagome

1 Zaburi y’umuyobozi w’abaririmbyi. Ni iya Dawidi, umugaragu w’Uhoraho.

2 Nimwumve iri jambo:

umutima w’umugome wuzuye ibicumuro,

ntiyigera atinya Imana.

3 Ni umuntu wiyemera cyane,

ntazirikana ibyaha bye ngo abizinukwe.

4 Amagambo avuga yuzuye ubugome n’ibinyoma,

ubwenge bwo gukora ibyiza yabuteye umugongo.

Ineza y’Uhoraho

5 Imigambi y’ubugome ayicura nijoro,

yiyemeza gukora ibidatunganye ntareke gukora ibibi.

6 Nyamara wowe Uhoraho, ineza ugira isesuye ijuru,

umurava wawe ugera ku bicu.

7 Ubutungane bwawe buhanitse nk’imisozi miremire,

ubutabera bwawe busendereye nk’inyanja ngari.

Uhoraho, wita ku bantu no ku nyamaswa.

8 Mana, mbega ukuntu ineza ugira ihebuje!

Abantu baguhungiraho urababundikira ukabarinda.

9 Urabazimanira ukabahundazaho ibyiza byawe,

ubagirira ubuntu busendereye nk’uruzi.

10 Koko ni wowe sōko y’ubugingo,

uri n’urumuri rutumurikira.

11 Ujye ugirira neza abakumenye,

abafite umutima uboneye ubagaragarize ko uri intungane.

12 Ntugakundire abirasi kungirira nabi,

abagome ntukabakundire kuntera guhunga.

13 Dore inkozi z’ibibi zaratsinzwe,

zaraguye ntizongera kubyutsa umutwe.

Iherezo ry’abagome n’iry’intungane

1 Zaburi ya Dawidi.

Ntugahagarikwe umutima n’ibyo abagome bakora,

ntukagirire ishyari inkozi z’ibibi.

2 Bazashiraho vuba nk’ibyatsi birabye,

bapfe nk’ibimera byumye.

3 Jya wizera Uhoraho ukore ibikwiye,

uzaramba mu gihugu ukigiriremo amahoro.

4 Ujye wishimira Uhoraho,

na we azaguha ibyo wifuza.

5 Ujye wiyegurira Uhoraho,

umwizere na we azagutabara.

6 Ubutungane bwawe buzamurika nk’izuba rirashe,

ubutabera bwawe buboneke nk’izuba ryo ku manywa y’ihangu.

7 Jya uturiza imbere y’Uhoraho, umutegereze wihanganye.

Ntugahagarikwe umutima n’uko abagome bahiriwe,

ntugahagarikwe umutima n’abasohoza imigambi yabo mibi.

8 Reka kugira umujinya wirinde kurakara,

ntugahagarike umutima byagutera gukora ibibi.

9 Koko abagome bazarimbuka,

naho abiringira Uhoraho bazaragwa igihugu.

10 Hasigaye igihe gito abagome bagashiraho,

uzabashakira aho bahoze we kubabona.

11 Ariko abicisha bugufi bazaragwa igihugu,

bazacyishimiremo bagire amahoro asesuye.

12 Abagome bagambanira intungane,

bazihekenyera amenyo,

13 nyamara Nyagasani arabasekēra,

azi ko iherezo ryabo ryegereje.

14 Abagome bakura inkota bagafora n’imiheto,

bashaka kwica abanyamibabaro n’abakene,

bashaka no gusogota abafite imigenzereze iboneye.

15 Nyamara inkota zabo ni bo zizica,

imiheto yabo ivunagurike.

16 Ibike intungane itunze bigira agaciro,

biruta ubukungu bwinshi bw’abagome.

17 Ububasha bw’abagome Uhoraho azabushegesha,

naho intungane azazishyigikira.

18 Uhoraho yita ku ndakemwa igihe cyose,

umunani azigenera uzahoraho iteka ryose.

19 Mu bihe bikomeye ibyago ntibizazigeraho,

inzara nitera zizahorana ibizihagije.

20 Nyamara abagome bazarimbuka,

abanzi b’Uhoraho bazashira nk’uburabyo bwo mu gasozi,

bazashira bayoyoke nk’umwotsi.

21 Umugome araguza ntiyishyure,

naho intungane igira ubuntu igatanga.

22 Abo Uhoraho aha umugisha bazaragwa igihugu,

naho abo avuma bazarimbuka.

23 Uhoraho ni we ukomeza abantu akabayobora,

imigenzereze yabo arayīshīmira.

24 Nubwo basitara ntibazagwa,

koko Uhoraho arabaramira.

25 Dore ndashaje,

ariko kuva ndi muto sindabona Imana itererana umuntu w’intungane,

sindabona n’umwana we asabiriza ibyokurya.

26 Ahubwo bene uwo muntu ahora agira ubuntu akaguriza abandi,

abana be bagira umugisha.

27 Reka gukora ibibi ukore ibyiza,

bityo uzahabwa aho uba iteka ryose.

28 Koko Uhoraho akunda ubutabera,

indahemuka ze ntazitererana burundu, arazirinda.

Nyamara urubyaro rw’abagome rwo ruzarimbuka.

29 Intungane zizaragwa igihugu,

zizakibamo ubuziraherezo.

30 Umuntu w’intungane avugana ubwenge,

amagambo ye ni ay’ubutabera.

31 Amategeko y’Imana ye ayahoza ku mutima,

ntabwo yigera ayateshuka.

32 Umugome agenza intungane,

ayigenza ashaka kuyica,

33 Uhoraho ntayirekera mu maboko y’umugome.

Nishyirwa mu rubanza Uhoraho azayirenganura.

34 Ujye wiringira Uhoraho ukurikize amabwiriza ye,

azaguha icyubahiro akurage igihugu,

abagome barimbuke ubireba.

35 Nabonye umugome wategekeshaga igitugu,

arasagamba amera nk’igiti cya cyimeza gitoshye,

36 ariko nongeye kuhanyura sinamubona,

ndamushakashaka ndamubura.

37 Ujye witegereza umuntu w’indakemwa,

urebe umuntu w’intungane,

bene abo banyamahoro bisazira neza.

38 Ariko abanyabyaha bose bazarimbuka,

abagome ntibazisazira.

39 Uhoraho ni we ukiza intungane,

mu gihe cy’amakuba azibera ubuhungiro.

40 Uhoraho arazitabara akazikiza,

azikiza abagome akazirokora,

arazirokora kubera ko zimuhungiraho.

Isengesho ry’umurwayi uzirikana ibyaha bye

1 Zaburi ya Dawidi, yahimbiwe kuba urwibutso.

2 Uhoraho, nubwo undakariye ntuncireho iteka,

umujinya ntugutere kumpana wihanukiriye.

3 Dore imyambi y’amakuba wandashe yarampinguranyije,

ukuboko kwawe kwarantembagaje.

4 Kubera umujinya wawe mu mubiri wanjye nta hazima,

kubera ibyaha byanjye ndababara mu ngingo.

5 Koko ibicumuro byanjye bimaze kundenga,

bindemereye nk’umutwaro munini ukabije.

6 Ndwaye ibisebe bininda amashyira bikanuka,

ubwo burwayi nabutewe n’ubucucu bwanjye.

7 Ncitse intege ndacogoye bikomeye,

niriranwa ishavu umunsi ukira.

8 Ndahinda umuriro nacitse umugongo,

mu mubiri wanjye wose nta hazima.

9 Imbaraga zinshizemo ndazahaye cyane,

ndaniha kubera ko nshenguka umutima.

10 Nyagasani, ibyo nifuza urabizi byose,

ntuyobewe uko mpora nsuhuza umutima.

11 Umutima wanjye uradiha cyane,

imbaraga zinshizemo,

amaso yanjye yahwereye.

12 Incuti zanjye na bagenzi banjye bahunze ibisebe byanjye,

bene wacu na bo bampaye akato.

13 Abashaka kumpitana banteze imitego,

abanshakira ibyago barangambanira,

birirwa bashaka amayeri yo kubigeraho.

14 Nyamara jye nigira nk’igipfamatwi singire icyo numva,

nigira nk’ikiragi singire icyo mvuga.

15 Meze nk’umuntu utagira icyo yumva,

meze nk’umuntu utagira icyo asubiza abandi.

16 Uhoraho, ni wowe niringiye,

Nyagasani Mana yanjye, ni wowe uzantabara.

17 Koko naragusabye nti:

“Abanzi banjye ntibakanyishime hejuru,

ntukareke ndunduka ngo bankine ku mubyimba.”

18 Dore ndenda kurunduka,

mpora mfite uburibwe.

19 Koko ndemera ko nacumuye,

ibyaha byanjye bimpoza ku nkeke.

20 Nyamara abanzi banjye bo ni abanyambaraga b’inziramuze,

abanyanga bampora ubusa ni benshi cyane.

21 Ineza nabagiriye bayinyitura inabi,

baransebya bampora ko nihatira gukora ibyiza.

22 Uhoraho, ntuntererane,

Mana yanjye, ntumbe kure.

23 Nyagasani Mukiza wanjye,

tebuka untabare.

Isengesho ry’umunyamibabaro

1 Zaburi y’umuyobozi w’abaririmbyi. Ni iya Yedutuni na Dawidi.

2 Naribwiye nti: “Mu migenzereze yanjye nzirinda gucumura,

nzirinda gucumura no mu byo mvuga,

nzajya mfata ururimi rwanjye igihe cyose ndi kumwe n’abagome.”

3 Nabaye nk’ikiragi ndicecekera sinagira icyo mvuga,

ibyo nta cyo byamariye narushijeho kubabara.

4 Ishavu ryanshenguye umutima,

naniha nkarushaho kuribwa,

bigeze aho ndavuga nti:

5 “Uhoraho, mbwira igihe nzapfira,

umbwire iminsi nshigaje kubaho,

bityo menye ko ubuzima bwanjye ari bugufi.

6 Iminsi yo kubaho kwanjye warayitubije ingana urwara,

kurama kwanjye ni ubusa imbere yawe.

Umuntu wese ni ubusa nubwo mubona agenda.

Kuruhuka.

7 Ni koko umuntu ahita nk’igicucu.

Akora hirya agakora hino ariko byose ni ubusa,

yirundanyaho ubukungu ariko atazi uzabusigarana.

8 “None se Nyagasani, ubwo ari uko bimeze nizeye iki?

Ni wowe wenyine niringira.

9 Umbabarire ibicumuro byanjye byose,

ntiwemere ko abantu b’ibicucu bangira urw’amenyo.

10 Ndicecekeye nta cyo nongera kuvuga,

koko ni wowe wanteye kumera gutya.

11 Wikomeza kumpana,

inkoni zawe zirandembeje!

12 Ucyaha umuntu ukamuhana umuziza ibicumuro bye,

ibyo akunda cyane ubitsemba nk’uko inyenzi zitsemba imyenda.

Koko rero umuntu wese ni ubusa!

Kuruhuka.

13 “Uhoraho, umva ugusenga kwanjye,

tega amatwi wumve ugutakamba kwanjye,

we kwirengagiza amarira yanjye.

Erega kuri wowe ndi umushyitsi gusa,

ndi umugenzi nka ba sogokuruza!

14 “Noneho mpa agahenge nongere nishime,

nishime ntaritārura ngo mve ku isi.”

Gusingiza Uhoraho no kumutabaza

1 Zaburi y’umuyobozi w’abaririmbyi. Ni iya Dawidi.

2 Nategereje Uhoraho ndihangana,

yanteze amatwi yumva ugutakamba kwanjye.

3 Yankuye mu rwobo ruteye ubwoba rwuzuye ibyondo by’isayo,

ampagarika ku rutare arankomeza.

4 Yampaye kuririmba indirimbo nshya yo gusingiza Imana yacu,

benshi babibonye bubaha Uhoraho baramwizera.

5 Hahirwa umuntu wizera Uhoraho,

ntiyishinge abirasi,

ntiyishinge n’abanyabinyoma.

6 Uhoraho Mana yanjye, ntawe uhwanye nawe!

Mbega ibitangaza wakoze!

Mbega imigambi myiza udufitiye!

Ngerageje kubirondora nkabivuga sinabishobora ni byinshi!

7 Ibitambo n’amaturo si byo bigushimisha,

ibitambo bikongorwa n’umuriro n’ibyo guhongerera ibyaha si byo ushaka,

ariko amatwi yanjye warayazibuye ibyo ndabisobanukirwa.

8 Nuko ndavuga nti: “Dore ndaje,

ndaje nk’uko byanditswe kuri jye mu muzingo w’igitabo cy’Amategeko.”

9 Mana yanjye, icyo nifuza ni ugukora ibyo ushaka,

Amategeko yawe yancengeyemo.

10 Ndamamaza ubutungane bwawe mu ikoraniro rinini ry’abayoboke bawe,

Uhoraho, urabizi sinzigera mbiceceka!

11 Ubutungane bwawe sinabugize ibanga,

umurava wawe n’agakiza kawe sinaretse kubivuga,

imbabazi zawe n’ukuri kwawe nabitangarije ikoraniro rinini.

12 Uhoraho, ntuzanyime impuhwe zawe,

uzandindishe imbabazi zawe n’ukuri kwawe ubutitsa.

Isengesho ryo gutabaza Uhoraho

13 Ibyago bitabarika bingose impande zose,

ibicumuro byanjye birankurikiranye,

birankurikiranye ku buryo ari byo ntekereza byonyine,

biruta ubwinshi umusatsi wanjye byankuye umutima.

14 Uhoraho, nubishaka unkize!

Uhoraho, tebuka untabare!

15 Abashaka kungomwa ubugingo bose nibamware bakorwe n’isoni.

Abanyifuriza ibyago nibasubire inyuma basuzugurwe.

16 Abambwira bati: “Awa awa!” Nibamware,

nibamware babure icyo bavuga.

17 Naho abayoboke bawe bose nibakwishimire bisesuye.

Abishimira ko uri Umukiza wabo bajye bavuga bati:

“Uhoraho nakuzwe!”

18 Naho jyewe ndi umunyamibabaro n’umukene,

nyamara Nyagasani anyitaho.

Mana yanjye, ni wowe untabara ukandengera,

tebuka ungoboke!