Category: Yozuwe

Imijyi y’Abalevi

1 Abatware b’umuryango wa Levi basanga umutambyi Eleyazari na Yozuwe mwene Nuni, n’abatware b’iyindi miryango y’Abisiraheli,

2 aho bari bari i Shilo mu gihugu cya Kanāni. Nuko barababwira bati: “Musa akiriho, Uhoraho yamutegetse ko tuzahabwa imijyi yo guturamo n’inzuri ziyikikije zo kuragiramo amatungo yacu.”

3 Nuko Abisiraheli baha Abalevi imijyi n’inzuri ziyikikije bavanye mu migabane yabo, nk’uko Uhoraho yabitegetse.

4 Amazu y’Abalevi bakomoka kuri Kehati ni yo ya mbere ubufindo bwerekanye. Inzu y’abakomoka ku mutambyi Aroni, yahawe imijyi cumi n’itatu yo mu ntara y’Abayuda n’iy’Abasimeyoni n’iy’Ababenyamini, nk’uko ubufindo bwabyerekanye.

5 Abandi Bakehati bahawe imijyi icumi yo mu ntara y’Abefurayimu n’iy’Abadani, n’iy’Abamanase batuye iburengerazuba bwa Yorodani, nk’uko ubufindo bwabyerekanye.

6 Inzu y’Abagerishoni yahawe imijyi cumi n’itatu yo mu ntara y’Abisakari n’iy’Abashēri, n’iy’Abanafutali n’iy’Abamanase batuye muri Bashani, nk’uko ubufindo bwabyerekanye.

7 Inzu y’Abamerari yahawe imijyi cumi n’ibiri yo mu ntara y’Abarubeni, n’iy’Abagadi n’iy’Abazabuloni.

8 Abisiraheli bahaye Abalevi iyo mijyi n’inzuri ziyikikije bakoresheje ubufindo, nk’uko Uhoraho yabitegetse abinyujije kuri Musa.

9 Mu ntara y’Abayuda n’iy’Abasimeyoni, hatanzwe imijyi ikurikira igiye kuvugwa mu mazina,

10 yahawe abakomoka kuri Aroni bo mu nzu ya Kehati mwene Levi, kuko ari bo ubufindo bwabanje kwerekana.

11 Bahawe Heburoni n’inzuri ziwukikije mu misozi y’Abayuda. Uwo mujyi wahoze witwa Kiriyati-Aruba waritiriwe Aruba, sekuruza w’Abanaki.

12 Icyakora Kalebu mwene Yefune yagumanye imirima yaho n’imidugudu ihakikije.

13 Abakomoka kuri Aroni bahawe Heburoni, umwe mu mijyi y’ubuhungiro, na Libuna

14 na Yatiri na Eshitemowa,

15 na Holoni na Debiri,

16 na Ayini na Yuta na Beti-Shemeshi. Bahawe iyo mijyi uko ari icyenda hamwe n’inzuri ziyikikije mu ntara y’Abayuda n’iy’Abasimeyoni.

17 Mu ntara y’Ababenyamini, bahawe Gibeyoni na Geba

18 na Anatoti na Alumoni, imijyi ine n’inzuri ziyikikije.

19 Iyo mijyi cumi n’itatu n’inzuri ziyikikije, ni yo yahawe abatambyi bakomoka kuri Aroni.

20 Abandi Balevi bakomoka kuri Kehati bahawe imijyi hakoreshejwe ubufindo. Mu ntara y’Abefurayimu,

21 bahawe Shekemu n’inzuri ziyikikije mu misozi y’Abefurayimu. Shekemu iyo ni umwe mu mijyi y’ubuhungiro. Bahawe na Gezeri

22 na Kibusayimu na Betihoroni, imijyi ine hamwe n’inzuri ziyikikije.

23 Mu ntara y’Abadani, bahawe Eliteke na Gibetoni

24 na Ayaloni na Gatirimoni, imijyi ine n’inzuri ziyikikije.

25 Mu ntara y’Abamanase iburengerazuba bwa Yorodani, bahawe imijyi ibiri n’inzuri ziyikikije, ari yo Tānaki na Yibuleyamu.

26 Iyo mijyi icumi n’inzuri ziyikikije, ni yo yahawe Abakehati batari abatambyi.

27 Abalevi bakomoka kuri Gerishoni na bo bahawe imijyi n’inzuri ziyikikije. Mu ntara y’Abamanase y’i Bashani bahawe imijyi ibiri, ari yo Golani umwe mu mijyi y’ubuhungiro, na Bēshitera.

28 Mu ntara y’Abisakari bahawe Kishiyoni na Daberati,

29 na Yarimuti na Eniganimu, imijyi ine n’inzuri ziyikikije.

30 Mu ntara y’Abashēri bahawe Mishali na Abudoni

31 na Helikati na Rehobu, imijyi ine n’inzuri ziyikikije.

32 Mu ntara y’Abanafutali bahawe Kedeshi yo muri Galileya umwe mu mijyi y’ubuhungiro, na Hamotidori na Karitani, imijyi itatu n’inzuri ziyikikije.

33 Iyo mijyi cumi n’itatu n’inzuri ziyikikije, ni yo yahawe Abagerishoni.

34 Abalevi basigaye ari bo bakomoka kuri Merari, na bo bahawe imijyi n’inzuri ziyikikije. Mu ntara y’Abazabuloni bahawe Yokineyamu na Karita

35 na Dimuna na Nahalali, imijyi ine n’inzuri ziyikikije.

36 Mu ntara y’Abarubeni iburasirazuba bwa Yorodani, bahawe Beseri umwe mu mijyi y’ubuhungiro, iri mu mirambi ahateganye n’ubutayu, bahawe na Yahasi

37 na Kedemoti na Mefāti, imijyi ine n’inzuri ziyikikije.

38 Mu ntara y’Abagadi bahawe Ramoti y’i Gileyadi umwe mu mijyi y’ubuhugiro, na Mahanayimu

39 na Heshiboni na Yāzeri, imijyi ine n’inzuri ziyikikije.

40 Iyo mijyi cumi n’ibiri n’inzuri ziyikikije ni yo yahawe Abalevi bari basigaye, ari bo Bamerari. Bayihawe hakoreshejwe ubufindo.

41 Iyo mijyi yose Abalevi bahawe mu ntara z’abandi Bisiraheli ni mirongo ine n’umunani,

42 iyo mijyi bayihanywe n’inzuri ziyikikije.

Abisiraheli batura mu gihugu basezeranyijwe

43 Uko ni ko Uhoraho yahaye Abisiraheli igihugu cyose yari yarasezeranyije ba sekuruza. Bamaze kucyigarurira bagituramo.

44 Uhoraho abaha amahoro ku mipaka yose nk’uko yari yarabisezeranyije ba sekuruza. Nta n’umwe mu banzi babo bose wabahangaye, kuko Uhoraho yahaye Abisiraheli kubatsinda.

45 Amasezerano yose Uhoraho yari yarasezeranyije Abisiraheli, yarayasohoje ntihasigara na rimwe.

Yozuwe asezerera abo hakurya ya Yorodani

1 Nuko Yozuwe ahamagaza Abarubeni n’Abagadi n’igice cy’Abamanase,

2 arababwira ati: “Mwakurikije ibyo Musa umugaragu w’Uhoraho yabategetse byose, kandi mwumviye amabwiriza yose nabahaye.

3 Ntimwatereranye bene wanyu b’Abisiraheli muri iki gihe kirekire gishize, ahubwo mwasohoje ibyo Uhoraho Imana yanyu yabategetse.

4 Ubwo Uhoraho Imana yanyu yahaye bene wanyu amahoro nk’uko yabibasezeranyije, nimwisubirire iwanyu muture mu karere Musa umugaragu w’Uhoraho yabahaye, hakurya ya Yorodani.

5 Icyakora muzitondere amabwiriza n’amategeko Musa umugaragu w’Uhoraho yabahaye. Mujye mukunda Uhoraho Imana yanyu mugenze uko ashaka, mukurikize amabwiriza ye, mubane na we akaramata kandi mumukorere n’umutima wanyu wose n’ubushobozi bwanyu bwose.”

6 Nuko Yozuwe abasabira umugisha, maze arabasezerera kugira ngo batahe,

7-8 avuga ati: “Nimwisubirire iwanyu, mujyane n’ubukungu bwinshi bwose mwaronse, ari amatungo, ari ifeza n’izahabu, ari umuringa n’icyuma, ari n’imyambaro myinshi cyane. Iyo minyago muzayigabane n’abo mu miryango yanyu.” (Igice kimwe cy’umuryango wa Manase, Musa yari yaragihaye umugabane i Bashani mu burasirazuba bwa Yorodani, naho ikindi gice Yozuwe yaragihaye umugabane, hamwe na bene wabo bari mu burengerazuba bwa Yorodani.)

9 Nuko Abarubeni n’Abagadi n’igice cy’Abamanase batandukanira n’abandi Bisiraheli i Shilo mu gihugu cya Kanāni, bajya i Gileyadi mu karere Uhoraho yabahaye abinyujije kuri Musa.

Urutambiro rwubatswe hafi ya Yorodani

10 Bakiri mu gihugu cya Kanāni, bubaka urutambiro runini cyane hafi y’uruzi rwa Yorodani.

11 Abandi Bisiraheli bumva ko Abarubeni n’Abagadi n’igice cy’Abamanase bubatse urutambiro hafi ya Yorodani, mu gihugu cya Kanāni.

12 Nuko bakoranira i Shilo, kugira ngo bajye gutera imiryango yo mu burasirazuba.

13 Ariko babanza kohereza Finehasi, mwene Eleyazari umutambyi mu ntara ya Gileyadi, kugira ngo avugane n’Abarubeni n’Abagadi n’igice cy’Abamanase.

14 Yajyanye n’abatware icumi, umwe muri buri muryango w’Abisiraheli b’iburengerazuba bwa Yorodani, bose bari abakuru b’amazu mu miryango yabo.

15 Nuko bajya i Gileyadi, maze babwira iyo miryango yo mu burasirazuba bati:

16 “Abandi Bisiraheli bakoranye mu izina ry’Uhoraho baradutuma bati: ‘Ni kuki mwahemukiye Imana y’Abisiraheli? Kuki mwateshutse ku Uhoraho mukamugomera mwiyubakira urutambiro?

17 Mbese ntimwibuka uko twacumuye turi i Pewori, bigatuma Uhoraho aduteza icyorezo kikidukurikiranye na n’ubu? Mbese icyo gicumuro nticyari gihagije?

18 Nyamara dore mwebwe mwongeye kwigomeka ku Uhoraho! Ntimuzi ko nimumucumuraho uyu munsi, ejo azarakarira Abisiraheli bose?

19 Niba mwumva ko akarere kanyu gahumanye, nimuze mu gihugu cy’Uhoraho aho Ihema rye riri, muhabwe imigabane hamwe natwe. Ariko mwirinde kwigomeka ku Uhoraho Imana yacu mwubaka urundi rutambiro rutari urwe, kandi natwe mwe kutwigomekaho.

20 Mbese ntimwibuka uko Akani ukomoka kuri Zera yahemutse bikabije, agatwara ibintu byeguriwe Uhoraho? Byatumye Uhoraho arakarira Abisiraheli bose. Akani si we wenyine wapfuye azize icyo gicumuro.’ ”

21 Nuko Abarubeni n’Abagadi n’igice cy’Abamanase, basubiza abatware b’indi miryango bati:

22 “Uhoraho ni we Mana nyamana! Uhoraho Imana nyamana ni we ubizi, ndetse n’Abisiraheli bose babimenye! Niba twarigometse ku Uhoraho tugahemuka, muhite muturimbura!

23 Niba twariyubakiye urutambiro tugamije kwimūra Uhoraho, tukaruturiraho ibitambo bikongorwa n’umuriro cyangwa iby’umusangiro, cyangwa amaturo y’ibinyampeke, Uhoraho ubwe atwihanire!

24 Nyamara si cyo cyatumye turwubaka. Ahubwo twatinyaga ko abazabakomokaho bazabaza abacu bati: ‘Muhuriye he n’Uhoraho Imana y’Abisiraheli?

25 Uhoraho ubwe yagize Yorodani umupaka hagati yacu namwe Abarubeni n’Abagadi. None rero, nta cyo muhuriyeho n’Uhoraho!’ Bityo bakabuza abazadukomokaho kuyoboka Uhoraho.

26 Ni yo mpamvu twiyemeje kubaka urwo rutambiro, atari urwo gutambiriraho ibitambo ibyo ari byo byose,

27 ahubwo ari ikimenyetso hagati yacu namwe n’abazadukomokaho, kigaragaza ko tuyoboka Uhoraho kandi ko tuzamutambirira ibitambo bikongorwa n’umuriro n’iby’umusangiro, n’ibindi bitambo byose mu Ihema rye. Bityo abazabakomokaho ntibazabwira abacu ko nta cyo bahuriyeho n’Uhoraho.

28 Nibaramuka bavuze batyo, abazadukomokaho bazasubiza bati: ‘Nimurebe urutambiro ba sokuruza bubatse rumeze nk’urw’Uhoraho. Nyamara si urwo gutambiraho ibitambo ibyo ari byo byose, ahubwo ni ikimenyetso hagati yacu namwe.’

29 Ntibikabeho ko twakwigomeka ku Uhoraho ngo tureke kumuyoboka twubaka urutambiro rwo gutambiraho ibitambo bikongorwa n’umuriro, cyangwa amaturo y’ibinyampeke cyangwa ibindi bitambo. Nta handi twifuza kubitambira, atari ku rutambiro rw’Uhoraho Imana yacu ruri imbere y’Ihema rye.”

30 Umutambyi Finehasi n’abakuru b’Abisiraheli, ari bo bakuru b’amazu bari kumwe na we, banyurwa n’ibisobanuro bahawe n’Abarubeni n’Abagadi n’Abamanase.

31 Finehasi mwene Eleyazari umutambyi arababwira ati: “Noneho tumenye ko mutahemukiye Uhoraho nk’uko twibwiraga. Ntimwashyize Abisiraheli mu kaga ko guhanwa n’Uhoraho, tumenye ko ari kumwe natwe.”

32 Hanyuma Finehasi mwene Eleyazari umutambyi, na ba batware basezera ku Barubeni n’Abagadi, bava mu ntara ya Gileyadi basubira muri Kanāni, maze babwira abandi Bisiraheli iby’urugendo rwabo.

33 Nuko babyumvise baranezerwa basingiza Imana, bareka umugambi wo gutera Abarubeni n’Abagadi, no gutsemba intara zabo.

34 Abarubeni n’Abagadi bita urwo rutambiro “Kimenyetso”, bagira bati:“Ruzatubere ikimenyetso cy’uko Uhoraho ari Imana.”

Yozuwe yibutsa Abisiraheli kuyoboka Uhoraho

1 Uhoraho yahaye Abisiraheli amahoro abarinda abanzi babakikije. Hashize igihe kirekire, Yozuwe aba ageze mu za bukuru,

2 ahamagaza Abisiraheli bose barimo n’abakuru b’imiryango n’abatware n’abacamanza n’abandi bashinzwe ubutabera, arababwira ati: “Dore ndashaje, ngeze mu za bukuru.

3 Mwiboneye uko Uhoraho Imana yanyu yagenje amahanga yari atuye muri iki gihugu kubera mwe, ni we ubwe wabarwaniriye.

4 Nagabanyije igihugu cyose kuva kuri Yorodani kugeza ku Nyanja ya Mediterane, haba ahari hatuwe n’amahanga twatsinze, haba n’aho tutaratsinda, buri muryango wahawe umugabane wawo.

5 Uhoraho Imana yanyu ubwe ni we uzamenesha ayo mahanga asigaye, azayirukana muyazungure nk’uko yabibasezeranyije.

6 Muzabe intwari cyane, kandi muzitondere ibyanditswe byose mu gitabo cy’Amategeko ya Musa mudateshuka.

7 Ntimuzifatanye n’ayo mahanga asigaye muri mwe, ntimuzambaze imana zayo kandi ntimuzarahire mu izina ryazo, ntimuzaziyoboke cyangwa ngo muziramye.

8 Muzabane akaramata n’Uhoraho Imana yanyu, nk’uko mwabigenje kugeza ubu.

9 Uhoraho yabameneshereje amahanga akomeye kandi y’ibihangange, kugeza ubu nta wabahangaye.

10 Umuntu umwe muri mwe yashoboye kumenesha abanzi igihumbi, kuko Uhoraho Imana yanyu ari we wabarwaniriye nk’uko yabibasezeranyije.

11 Muramenye rero muzakunde Uhoraho Imana yanyu.

12 Ntimuzamwimūre, ntimuzagirane amasezerano n’abanyamahanga bacitse ku icumu basigaye muri mwe, ntimuzashyingirane na bo kandi ntimuzifatanye na bo.

13 Naho ubundi Uhoraho ntiyakomeza kumenesha abo banyamahanga mu gihugu cyanyu bazababera nk’umutego cyangwa nk’ikiboko ku mugongo, cyangwa nk’igitotsi mu jisho, kugeza igihe muzashirira muri iki gihugu cyiza Uhoraho Imana yanyu yabahaye.

14 “Dore jyewe ngiye kwigendera, ariko mwe muzi neza mudashidikanya ko ibyiza byose Uhoraho Imana yanyu yabasezeranyije yabisohoje, nta na kimwe atasohoje.

15 None rero nk’uko yasohoje ibyo byiza byose, ni na ko azasohoza n’ibibi byose yababwiye kugeza ubwo azabatsemba muri iki gihugu cyiza,

16 nimutubahiriza Isezerano yabahaye. Nimuyoboka izindi mana mukaziramya, Uhoraho Imana yanyu azabarakarira ahite abamara muri iki gihugu cyiza yabahaye.”

Abisiraheli basezerana kuyoboka Uhoraho

1 Yozuwe akoranyiriza imiryango yose y’Abisiraheli i Shekemu, maze ahamagara n’abakuru b’Abisiraheli n’abatware n’abacamanza n’abandi bashinzwe ubutabera, bose baza imbere y’Imana.

2 Nuko Yozuwe abwira Abisiraheli bose ati: “Uhoraho Imana yanyu aravuze ati: ‘Kera mu gihe cya Tera se wa Aburahamu na Nahori, ba sokuruza bari batuye hakurya y’uruzi rwa Efurati basengaga ibigirwamana.

3 Nuko mvana sokuruza Aburahamu hakurya ya Efurati, muyobora mu gihugu cyose cya Kanāni, maze muha urubyaro rwinshi, abyara Izaki,

4 Izaki na we abyara Yakobo na Ezawu. Ezawu namuhaye gutura mu misozi ya Seyiri, naho Yakobo n’urubyaro rwe basuhukira mu Misiri.

5 “Hanyuma ntumayo Musa na Aroni kuvanayo Abisiraheli, mbanje guteza Abanyamisiri ibyago bikomeye.

6 Navanye ababyeyi banyu mu Misiri, ariko Abanyamisiri babakurikira bari mu magare y’intambara no ku mafarasi, babageza ku Nyanja y’Uruseke.

7 Nuko Abisiraheli barantakambira, maze nshyira umwijima hagati yabo n’Abanyamisiri. Narengeje amazi y’inyanja ku Banyamisiri, bararohama Abisiraheli babibona. Nyuma y’ibyo mumara imyaka myinshi mu butayu.

8 Nabagejeje mu gihugu cy’Abamori bari batuye mu burasirazuba bwa Yorodani. Barabateye ariko ndababagabiza murabatsinda, mbaha kubatsemba mwigarurira igihugu cyabo.

9 Umwami w’i Mowabu witwaga Balaki mwene Sipori na we yarabateye. Ndetse yatumije Bālamu mwene Bewori kugira ngo abavume,

10 ariko sinamwemerera ko abavuma, ahubwo abahesha umugisha mubakiza ntyo.

11 Mwambutse Yorodani mugera i Yeriko. Abaturage baho kimwe n’Abamori n’Abaperizi n’Abanyakanāni, n’Abaheti n’Abagirigashi n’Abahivi n’Abayebuzi barabarwanyije, ariko bose narababagabije murabatsinda.

12 Igihe ba bami bombi b’Abamori babateraga nohereje amavubi arabamenesha, mutiriwe mukoresha inkota zanyu n’imiheto yanyu.

13 Nabahaye igihugu kitabaruhije mugihinga, mbatuza mu mijyi mutubatse, mbaha no kurya ku mbuto z’imizabibu n’iminzenze mutateye.”

14 Nuko Yozuwe arakomeza ati: “None rero nimwubahe Uhoraho, mumuyoboke mutaryarya kandi mubikuye ku mutima. Nimwamagane ibigirwamana ba sokuruza basengaga bakiri hakurya ya Efurati n’ibyo basengaga mu Misiri, maze muyoboke Uhoraho.

15 Ariko niba mudashaka kumuyoboka, mwihitiremo ibigirwamana muzayoboka, mbese nk’ibyo ba sokuruza basengaga bakiri hakurya ya Efurati, cyangwa iby’Abamori mwazunguye. Icyakora jyewe n’urugo rwanjye tuzayoboka Uhoraho.”

16 Nuko Abisiraheli baramusubiza bati: “Ntibikabeho ko twimūra Uhoraho! Ntabwo tuzayoboka izindi mana!

17 Koko Uhoraho Imana yacu ni we watuvanye mu Misiri, aho twebwe na ba sogokuruza twari inkoreragahato, twiboneye n’ibitangaza bikomeye yakoze. Ni we waturindiye mu rugendo rwose twakoze no mu mahanga yose twanyuzemo.

18 Ni we wirukanye ayo mahanga yose ndetse n’Abamori babaga muri iki gihugu. Natwe rero tuzayoboka Uhoraho, kuko ari we Mana yacu.”

19-20 Nuko Yozuwe abwira Abisiraheli ati: “Ntabwo mushobora kuyoboka Uhoraho mumubangikanyije n’ibigirwamana. Ni Imana nziranenge kandi ifuha. Ntabwo izihanganira ubwigomeke bwanyu n’ibicumuro byanyu, izabahinduka ibagirire nabi maze ibatsembe, kandi yari yarabagiriye iyo neza yose.”

21 Baramusubiza bati: “Oya, tuzayoboka Uhoraho.”

22 Yozuwe arababwira ati: “Mujye muzirikana ko ari mwe ubwanyu mwihitiyemo kuyoboka Uhoraho.”

Baramusubiza bati: “Tuzabizirikana.”

23 Nuko Yozuwe arababwira ati: “Nimwamagane ibigirwamana by’abanyamahanga biri muri mwe, maze mwiyegurire Uhoraho Imana y’Abisiraheli.”

24 Baramusubiza bati: “Tuzayoboka Uhoraho Imana yacu tumwumvire.”

25 Uwo munsi bari i Shekemu, Yozuwe agirana n’Abisiraheli amasezerano arimo amategeko n’amabwiriza bagomba gukurikiza,

26 ayandika mu gitabo cy’Amategeko y’Imana. Hanyuma afata ibuye rinini, arishinga munsi y’igiti cy’inganzamarumbu cyari hafi y’Inzu y’Uhoraho.

27 Nuko abwira Abisiraheli bose ati: “Iri buye rizatubera umugabo, kuko ryumvise amagambo yose Uhoraho yatubwiye. Nimuhemukira Imana yanyu rizabashinja.”

28 Nuko Yozuwe arabasezerera, buri muntu asubira iwe.

Urupfu rwa Yozuwe

29 Nyuma y’ibyo Yozuwe mwene Nuni akaba n’umugaragu w’Uhoraho, apfa amaze imyaka ijana na cumi avutse.

30 Bamuhamba mu isambu ye i Timunati-Sera mu misozi y’Abefurayimu, mu majyaruguru y’umusozi wa Gāshi.

31 Abisiraheli bayobotse Uhoraho igihe cyose Yozuwe yari akiriho, no mu gihe cy’abakuru b’imiryango babonye ibyo Uhoraho yakoreye Abisiraheli byose.

32 Nuko amagufwa ya Yozefu Abisiraheli bari barakuye mu Misiri, bayahamba i Shekemu mu isambu Yakobo yari yaraguze na bene Hamori se wa Shekemu, ibikoroto ijana by’ifeza. Ayo magufwa aguma mu mugabane w’abakomoka kuri Yozefu.

33 Nuko Eleyazari mwene Aroni na we arapfa, bamuhamba ku musozi wari warahawe umuhungu we Finehasi, mu misozi y’Abefurayimu.