Category: Yobu

1 Erega guhangana na cyo ni ukwibeshya,

kukireba byonyine byatuma umuntu yitura hasi!

2 Ni nde wahangara kugishōtōra?

Ese ni nde watinyuka kundwanya?

3 Nta wagize icyo ampa ngo mbone kumwitura,

ikiri munsi y’ijuru cyose ni icyanjye.

4 Sinabura kuvuga uko ingingo z’icyo gikōko ziteye,

sinabura gutāka imbaraga zacyo n’ubuhangange bwacyo.

5 Ni nde wabasha kukivanaho uruhu?

Ni nde wahangara gupfumura uruhu rwacyo rukomeye?

6 Ni nde watinyuka kwasamura urwasaya rwacyo?

Imikaka yacyo iteye ubwoba.

7 Cyikingiye isharankima ku mugongo zimeze nk’ingabo,

zirasobekeranye kandi zirarumanye,

8 buri sharankima isobekeranye n’indi,

zisobekeranye ku buryo n’umuyaga utabona aho umenera.

9 Buri sharankima yomekeranye n’indi,

zirafatanye ku buryo nta cyazitandukanya.

10 Iyo cyitsamuye umuriro uraka,

amaso yacyo atukura nk’umuseke ukebye.

11 Mu rwasaya rwacyo hasohokamo ibirimi by’umuriro,

hasohokamo ibishashi.

12 Mu mazuru yacyo hapfupfunukamo umwuka,

hapfupfunukamo umwuka umeze nk’uw’inkono ibira.

13 Umwuka wacyo watsa amakara,

koko ibirimi by’umuriro bisohoka mu kanwa kacyo.

14 Imbaraga zacyo ziganditse mu gikanu cyacyo,

uhuye na cyo wese agira ubwoba.

15 Imihore yacyo irasobekeranye,

iromekeranye ku buryo itanyeganyega.

16 Umutima wacyo ukomeye nk’ibuye,

ndetse ukomeye nk’urusyo.

17 Iyo icyo gikōko kibadutse,

ibinyabubasha birakangarana,

bishya ubwoba bigatatana.

18 Kugitera inkota nta cyo byagitwara,

kugitera icumu cyangwa igihosho cyangwa imyambi, nta cyo bikibwiye.

19 Kuri cyo icumu ni nk’icyatsi,

intwaro icuzwe mu muringa kuri cyo n’igiti kiboze.

20 Imyambi ntigitsimbura,

kugitera amabuye ni nko kugitera icyatsi.

21 Kugikubita ubuhiri ni nko kugikubita icyatsi,

umuvumero w’icumu uragisetsa.

22 Ku nda yacyo hari isharankima zityaye,

aho kinyuze hose kihasiga inkōra.

23 Iyo cyiroshye mu nyanja amazi aribirindura,

inyanja izana urufuro nk’inkono ibira.

24 Aho kinyuze hasigara inkōra y’urwererane,

bityo amazi y’inyanja agahinduka urufuro.

25 Nta yindi nyamaswa ihwanye na cyo ku isi,

ni ikiremwa kitagira ubwoba.

26 Inyamaswa z’inyamaboko zose ziragitinya,

ni cyo mwami wazo zose.”

Yobu yemera intege nke ze

1 Nuko Yobu asubiza Uhoraho ati:

2 “Nzi ko ushobora byose,

imigambi yawe ntibasha kuburizwamo.

3 Waranyibarije uti:

‘Uri muntu ki uhinyura imigambi yanjye?

Mbese kuki uyihinyura uvuga amahomvu?’

Ni koko navuze ibyo ntasobanukiwe,

navuze ibitangaza ntari nzi.

4 Warambwiye uti:

‘Tega amatwi ureke abe ari jye uvuga,

ngiye kukubaza nawe unsubize.’

5 Najyaga numva bakuvuga,

none ndakwiboneye n’amaso yanjye.

6 Ndihannye nzinutswe ibyo navuze,

dore nicaye mu mukungugu no mu ivu.”

Uhoraho asubiza Yobu ishya n’ihirwe

7 Uhoraho amaze kuvugana na Yobu abwira Elifazi w’Umutemani ati: “Ndakurakariye cyane wowe na bagenzi bawe babiri, kubera ko mutamvuze ukuri nk’uko umugaragu wanjye Yobu yabigenje.

8 None rero nimushake amapfizi arindwi n’amasekurume y’intama arindwi, maze musange umugaragu wanjye Yobu. Mutambe igitambo gikongorwa n’umuriro cyo guhongerera ibyaha mwakoze. Kubera ko umugaragu wanjye Yobu ari we nemera, ari bubasabire imbabazi. Nzita ku isengesho rye ndeke kubagirira ibihwanye n’ubupfapfa bwanyu. Koko ntimwamvuze ukuri nk’uko umugaragu wanjye Yobu yabigenje.”

9 Nuko Elifazi w’Umutemani na Biludadi w’Umushuwa, na Sofari w’Umunāmati baragenda bagenza uko Uhoraho yababwiye, maze Uhoraho yita ku isengesho rya Yobu.

10 Yobu amaze gusengera izo ncuti ze, Uhoraho amusubiza ishya n’ihirwe. Umutungo we awumushumbusha incuro ebyiri.

11 Abavandimwe be na bashiki be n’incuti ze za kera, bose baza iwe kumusura basangira na we. Baramushyigikira kandi baramuhumuriza, kubera amakuba yose Uhoraho yari yaramuteje. Buri muntu mu bari aho amuha impano y’igikoroto cy’ifeza n’impeta y’izahabu.

12 Mu minsi iheruka y’ubuzima bwa Yobu, Uhoraho amuha umugisha kurusha uko yari yarawumuhaye mbere. Yobu yongera gutunga intama ibihumbi cumi na bine, n’ingamiya ibihumbi bitandatu, atunga n’amapfizi ibihumbi bibiri ahingishwa, atunga n’indogobe igihumbi.

13 Yobu abyara abahungu barindwi n’abakobwa batatu.

14 Umukobwa mukuru amwita Yemima, uwa kabiri amwita Keziya, naho uwa gatatu amwita Kereni-Hapuki.

15 Mu gihugu cyose nta bakobwa bari bahwanyije uburanga n’abakobwa ba Yobu. Nuko se abaha iminani hamwe na basaza babo.

16 Nyuma y’ibyo, Yobu amara indi myaka ijana na mirongo ine, yibonera abana be n’abuzukuru be ndetse yibonera n’ubuvivi.

17 Nuko Yobu apfa ashaje, ageze mu za bukuru.