Category: Ubuhanga

Ubuhanga bwayoboye Abisiraheli mu butayu

1 Ubuhanga bwatumye bagera ku migambi yabo,

bwakoresheje umuhanuzimuziranenge.

2 Bambukiranyije ubutayu budatuwe,

bashinze amahema yabo ahantu hatigeze hagendwa,

3 bahanganye n’abanzi babo barabahashya.

Agakiza k’Abisiraheli

4 Abisiraheli bagize inyota baragutakambira,

wabahaye amazi avubutse mu rutare,

urwo rutare rukomeye rubamara inyota.

5 Koko wahannye abanzi babo,

igihano wabahanishije cyagobotse Abisiraheli bageze mu kaga.

Urupfu rw’Abanyamisiri

6 Abanyamisiri bashatse kubicira abana warabahannye,

wahinduye uruzi amaraso avanze n’icyondo.

7 Nyamara abantu bawe wabahaye amazi menshi,

wabahaye amazi batari babyiteze,

8 wayabahaye umaze kubicisha inyota,

wabumvishije ukuntu wahannye abanzi babo.

9 Koko warabahannye nubwo wabikoranye imbabazi,

biboneye uko abagome bababazwa ubwo wabahanishaga uburakari bwawe.

10 Abantu bawe wabahannye nk’umubyeyi uhana abana be,

nyamara abo bagome wabahannye nk’umwami utababarira.

11 Abo bagome baba hafi cyangwa kure bababaye kimwe,

12 umubabaro wabo wikubye kabiri,

bashenguwe no kwibuka ibyababayeho.

13 Bamaze kumenya ko igihano bahanishijwe cyabereye Abisiraheli amahirwe,

Nyagasani, byatumye bamenya ko ari wowe wabagobotse.

14 Uwo Abanyamisiri bari baranitse ku gahinga,

uwo birukanye bamukwena,

igihe cyarageze baramutangarira,

koko bo bishwe n’inyota iruta iy’intungane.

Imana yoroshya ibihano by’Abanyamisiri

15 Ibitekerezo byabo bibi byarabayobeje,

byarabayobeje basenga ibikōko bikururuka n’izindi nyamaswa zidafite ubwenge,

warabahannye ubateza ibikōko by’amoko menshi bidafite ubwenge,

16 warabahannye kugira ngo bamenye ko bazize ibicumuro byabo.

17 Ku bw’imbaraga zawe zaremye isi ziyikuye mu busa,

washoboraga kubateza ibirura n’intare z’inkazi.

18 Washoboraga kubateza ibikōko by’inzaduka by’inkazi,

washoboraga kubateza ibikōko bihumeka umwuka utwika,

washoboraga kubateza ibikōko bicumbeka umwotsi,

washoboraga no kubateza ibikōko bifite amaso ateye ubwoba.

19 Uretse ko izo nyamaswa zashoboraga kubarimbura,

kuzibona ubwabyo byari gutuma bicwa n’ubwoba.

20 Uretse n’ibyo washoboraga kubicisha umwuka wawe,

bagombaga gukurikiranwa n’ubutabera bwawe,

bagombaga gukangaranywa n’ububasha bwawe.

Nyamara ibyo byose wabishyize kuri gahunda,

warabibaze kandi urabipima.

Imana ikunda ibyo yaremye byose

21 Uhora ukoresha ububasha bwawe bukomeye,

ni nde washobora guhangana nawe?

22 Ku bwawe isi ni nk’akantu gato gapimwe ku munzani,

ni nk’agatonyanga k’ikime kaguye ku butaka.

23 Nyamara ugirira bose impuhwe kuko ushobora byose,

wirengagiza ibyaha by’abantu kugira ngo bihane.

24 Ukunda ibiremwa byose kandi nta na kimwe wanga mu byo waremye,

koko iyo ugira icyo wanga muri byo ntuba warakiremye.

25 None se ni ikihe kiremwa cyari kubaho utabishatse?

Ni iki cyari gukomeza kubaho utarakiremye?

26 Nyagasani, ukunda ibyo waremye byose,

urabikunda kuko ari ibyawe.

1 Koko rero umwuka wawe udapfa uri mu biremwa byose.

2 Nyagasani, ukosora buhoro buhoro abacumuye,

urababurira ukabibutsa ibicumuro byabo,

urabibutsa kugira ngo bareke ibibi bakugarukire.

Imana yoroshya ibihano by’Abanyakanāni

3 Abari batuye igihugu wiyeguriye warabanze,

4 warabanze kubera ibikorwa byabo biteye ishozi,

bakoraga iby’ubupfumu n’imihango izira.

5 Abo bantu bicaga abana babo nta mbabazi,

bakoraga ibirori bakarya inyama z’abantu bakanywa n’amaraso.

6 Abo babyeyi bica ibibondo bidashoboye kwirengera,

washatse ko batsembwa na ba sekuruza,

7 washatse ko igihugu ukunda kuruta ibindi giturwa n’abakwiriye kuba abana b’Imana.

8 Nyamara abo na bo wabagiriye imbabazi kuko bari abantu,

wohereje inzuki zibanziriza ingabo zawe,

warazohereje ngo zibarimbure buhoro buhoro.

9 Abo bagome washoboraga kubagabiza intungane ku rugamba,

washoboraga guhera ko ubatsembesha inyamaswa z’inkazi ukoresheje itegeko ritababarira.

10 Nyamara wabahannye buhoro buhoro,

wabahaye igihe cyo kwihana.

Ntiwari uyobewe ko kamere yabo ari mbi,

ntiwari uyobewe ko bavutse ari abagome kandi badashobora guhindura imico,

11 koko ni ubwoko bwavumwekuva mu ntangiriro.

Niba warabaretse ntubahanire ibicumuro byabo,

ntibyatewe n’uko hari uwo watinyaga.

Impamvu yatumye Imana iborohera

12 Ni nde watinyuka kukubaza ati: “Wakoze ibiki?”

Ni nde wakwanga icyemezo cyawe?

Ni nde uzakuregera ko warimbuye amahanga wiremeye?

Ni nde wabasha guhinguka imbere yawe arengera abagome?

13 Nta yindi mana uretse wowe yakwita kuri bose,

imana wakwereka ko uca imanza z’ukuri.

14 Nta n’umwami cyangwa umutegetsi n’umwe,

umwami wahangara kurengera abo wahannye.

15 Koko uri intungane kandi ibyaremwe byose ubitegekana ubutabera,

guhana udakwiye guhanwa biciye ukubiri n’ububasha bwawe.

16 Imbaraga zawe ni zo sōko y’ubutabera,

uri umutegetsi w’ibyaremwe byose kandi ubyitaho byose.

17 Ugaragaza imbaraga zawe,

uzigaragaza iyo abantu bahinyuye ububasha bwawe,

uhana abirata ko bazi ububasha bwawe kandi babusuzugura.

18 Nyamara uri Nyirububasha,

udutegekesha ubwiyoroshye n’imbabazi,

ukoresha ububasha bwawe igihe cyose ubishatse.

Imana yigisha Abisiraheli

19 Wigishije abantu bawe ko intungane igomba kuba incuti y’abantu,

wahaye abana bawe icyizere,

wabahaye icyizere cy’uko bamaze gucumura bashobora kwihana.

20 Igihe wahanaga abanzi b’abana bawe waraboroheye,

waraboroheye nubwo bari bakwiye gupfa,

wabahaye igihe n’uburyo bwo kwihana ibibi byabo.

21 Nyamara abantu bawe wabahannye bikomeye,

warabahannye nubwo wari waragiranye amasezerano na ba sekuruza.

22 Iyo uhana abanzi bacu mu bwiyoroshye uba utwigisha,

uba utwigisha kugira ngo tuzirikane imbabazi zawe igihe duca imanza,

bityo igihe uducira imanza twiringire impuhwe zawe.

Igihano cy’abasenga inyamaswa

23 Wahannye abigometse bitewe n’ubupfapfa bwabo,

warabahannye kubera ibikorwa byabo biteye ishozi.

24 Koko barateshutse bakurikira inzira itari iy’ukuri,

barateshutse basenga inyamaswa zigayitse kurusha izindi,

bashutswe nk’abana bato bataragira ubwenge.

25 Wabahaye igihano nk’icy’abana bato,

icyo gihano cyatumye bakorwa n’isoni.

26 Nyamara abasuzuguye icyo gihano cyoroheje,

abo Imana yabahanishije igihano gikomeye.

27 Bamaze guhanwa kubera ibyo bikōko bibwiraga ko ari imana,

bamenye ko Imana y’ukuri ari iyo bari baranze kwemera,

ni cyo cyatumye bahabwa igihano gikomeye.

Ubupfapfa bw’abasenga ibiremwa

1 Abantu bose batigeze bamenya Imana ni abapfapfa,

abo bantu babonye ibyiza biriho,

nyamara ntibashoboye kumenya Uriho,

babona ibyo yaremye ariko ntibamenye Uwabiremye.

2 Ntibigeze bamenya Uwabiremye,

batekereje ko imana zitegeka isi ari umuriro n’umwuka,

inkubi y’umuyaga n’urujeje rw’inyenyeri,

imivumba y’amazi n’ibinyarumuri byo mu kirere.

3 Abo bantu bayobejwe n’uburanga bwabyo babyita imana,

bagombaga kumenya ko bifite Umugenga uruta byose,

koko Uwabiremye ni we nkomoko y’uburanga.

4 Niba baratangajwe n’ububasha bwabyo n’akamaro kabyo,

bagombaga kumenya ko Uwabiremye abirusha ububasha.

5 Koko rero iyo tuzirikanye ubuhangange n’uburanga bw’ibyaremwe,

bituma tumenya neza ubuhangange bw’Uwabiremye.

6 Abo bantu ntibari bakwiye kugawa cyane,

koko basaga n’aho bashakashaka Imana no kuyimenya by’ukuri,

nyamara ntibabishobora.

7 Bari bagituye rwagati mu biremwa byayo,

baharaniye kubimenya neza batwarwa n’uburanga bwabyo,

koko ibyo babonaga basanze ari byiza cyane.

8 Nyamara kandi abo bantu si abo kubabarirwa,

9 koko niba bari bafite ubwenge bwo kumenya ibyaremwe,

kuki batashoboye kumenya Umugenga w’ibyo byose?

Gusenga ibigirwamana

10 Baragowe abo bantu biringira ibintu bitagira ubuzima,

baragowe abita imana ibyakozwe n’abantu,

ibyo ni amashusho y’inyamaswa yacuzwe mu izahabu no mu ifeza,

ibuye ritagira agaciro ryabajwe n’umuntu wa kera na ryo baryita imana.

11 Umubāji atema igiti ashobora kwikorera,

agishishuraho ibishishwa neza akakibazanya ubuhanga,

agikoramo igikoresho gikenewe.

12 Ibice bisigaye abicanisha umuriro,

abitekesha ibyokurya agashira inzara.

13 Nyamara muri ibyo bice bisigaye bidafite akamaro,

ibice bigoramye cyangwa bifite amasubyo,

afata kimwe muri byo akabibaza igihe aruhuka,

akibaza abyitayeho maze akagiha ishusho y’umuntu,

14 ashobora no kugiha ishusho y’inyamaswa iteye ishozi.

Hanyuma iyo shusho ayisiga irangi ry’umutuku,

atunganya kandi ahantu hose hari ubusembwa.

15 Iyo amaze kuyitegurira ahantu hatunganye mu rukuta,

ayishyiramo akayifatisha icyuma,

16 akora uko ashoboye kose kugira ngo itagwa.

Koko azi neza ko yo ubwayo nta cyo ishoboye,

ni ishusho gusa ikeneye gushyigikirwa.

17 Nyamara uwo muntu yashaka gusabira ibintu bye,

iyo ashaka gusabira urugo rwe cyangwa abana be,

ntaterwa isoni no gutakambira icyo kintu kitagira ubuzima.

Iyo ashaka kumererwa neza atakambira icyo kintu kidafite ubushobozi,

18 iyo ashaka ubuzima atakambira icyapfuye,

iyo ashaka inkunga yitabaza ikitagize icyo gishoboye,

mu ngendo ze yiragiza ikitabasha gutambuka.

19 Naho ku byerekeye imibereho ye,

ibikorwa bye no guhirwa ku murimo we,

asaba imbaraga ikintu kitazifite.

Urundi rugero rwo gusenga ibigirwamana

1 Undi muntu na we yitegura kwambuka inyanja irimo imivumba ikaze,

atakambira ishusho y’igiti,

igiti cyamunzwe kurusha ubwato bumutwaye.

2 Umuntu yabaje ubwo bwato kugira ngo abone inyungu,

uwo mubaji yabukoranye ubuhanga,

3 nyamara wowe Data, ubushishozi bwawe ni bwo buyobora ubwo bwato.

Koko ni wowe wahanze inzira yabwo mu nyanja,

mu mivumba rwagati wahashyize inzira nyabagendwa.

4 Wagaragaje ko ushobora kugoboka abantu mu makuba yose,

urabagoboka nubwo banyura mu nyanja batabizobereyemo.

5 Ushaka ko ibikorwa by’Ubuhanga bwawe bigira akamaro,

ni yo mpamvu abantu biringira igiti kitagira shinge na rugero,

bambuka inyanja irimo imivumba bakoresheje ubwato budakomeye,

barambuka bakagera imusozi ari bataraga.

6 Ni ko byagenze no mu gihe cya kera,

igihe abirasi b’ibihangange barimbukaga,

uwari icyizere cy’isi yahungiye mu bwato ayobowe nawe,

bityo asiga urubyaro rw’ibisekuruza bizaza.

7 Haragahirwa igiti cyahindutse igikoresho cy’ubutungane,

8 nyamara havumwe ikigirwamana cyakibajwemo n’uwakibaje.

Uwo muntu avumwe kuko yakibaje,

icyo kigirwamana kivumwe kuko cyiswe imana kandi kibora.

9 Koko rero Imana yanga umugome n’ubugome bwe,

10 izahana icyo kigirwamana n’uwagikoze.

11 Imana izibasira ibigirwamana by’amahanga,

izabyibasira kuko ari ibizira mu biremwa byayo,

ibiremwa biyobya abantu bikabera abapfapfa umutego.

Inkomoko yo gusenga ibigirwamana

12 Igitekerezo cyo gukora ibigirwamana ni cyo nkomoko y’ubusambanyi,

kubikora ni byo byatumye abantu bayoba.

13 Koko ntibyigeze bibaho kuva mu ntangiriro,

nta n’ubwo bizabaho iteka ryose.

14 Ubwirasi bw’abantu ni bwo bwabizanye ku isi,

ni yo mpamvu iherezo byagenewe ritazatinda.

15 Umubyeyi wababajwe cyane n’urupfu rw’umwana we rutunguranye,

yakoresheje ishusho y’umwana we wari ukindutse,

bityo uwo mubyeyi aha icyubahiro uwapfuye nk’aho ari imana,

hanyuma aha abantu be umurage wo kubahiriza ayo mabanga n’iyo mihango.

16 Uko ibihe byagiye bisimburana uwo muco urakomera,

warakomeye kugeza ubwo wubahirizwa nk’itegeko.

Abategetsi na bo bashyizeho itegeko ryo gusenga amashusho abajwe.

17 Abantu batashoboraga gushengerera umwami kuko batuye kure,

bakoraga ishusho y’umwami bakayiramya,

bityo bakamuha icyubahiro nk’aho ahibereye.

18 Umunyabukorikori yayikundishaga abatamuzi bakamuramya.

19 Uwo munyabukorikori kugira ngo ashimishe umwami,

yakoraga ishusho nziza cyane.

20 Abantu bakururwa n’ubwiza bw’iyo shusho,

uwo umwami bahaga icyubahiro gikwiriye umuntu,

yahindutse imana isengwa.

21 Nguko uko abantu baguye mu mutego,

iyo babaga bari mu byago cyangwa bakandamijwe,

bafataga ibintu bikozwe mu mabuye cyangwa mu biti,

babyitiriraga Imana.

Ingaruka zo gusenga ibigirwamana

22 Kuba barayobye ntibamenye Imana ntibyabahagije,

ahubwo ubujiji bwabahejeje mu ntambara z’urudaca,

ibyago nk’ibyo bageze ubwo babyita amahoro.

23 Bishe abana babo bubahiriza imihango ififitse,

basenze ibigirwamana bakora ibiteye ishozi.

24 Ntibacyubaha ubuzima ndetse n’imibanire y’abashakanye,

umuntu yica mugenzi we amugambaniye,

aramubabaza iyo amusambanyiriza umugore.

25 Ibintu byose byabaye akajagari,

ubwicanyi n’ubujura n’ubuhendanyi,

ubushukanyi n’ubuhemu,

imidugararo n’uburiganya,

26 gutoteza abanyamurava no kwibagirwa ineza,

guta umuco no gukoresha imibiri ibinyuranye n’ibyo yaremewe,

ubwumvikane buke bw’abashakanye,

ubusambanyi n’ubwomanzi.

27 Koko rero gusenga ibigirwamana bitagira izina,

ni byo ntangiriro n’impamvu n’iherezo ry’icyitwa ikibi cyose.

28 Abantu babisenga birabanezeza bigatuma bata umutwe,

bahanura ibinyoma kandi ntibagira gahunda mu mibereho yabo,

ntibatinya kurenga ku ndahiro.

29 Biringira ibyo bigirwamana byabo bitagira ubuzima,

biringira ko indahiro zabo z’ibinyoma nta ngaruka mbi zizabatera.

30 Nyamara bazahanwa kubera izi mpamvu ebyiri,

biyibagije Imana bayoboka ibigirwamana,

birengagije ubutungane barahira ibinyoma.

31 Nubwo badatinya ububasha by’ibyo bigirwamana barahira,

izo nkozi z’ibibi zizahanishwa igihano cyateganyirijwe abanyabyaha.

Ukwemera kwatumye Abisiraheli badasenga ibigirwamana

1 Ariko wowe Mana yacu, ugira ubuntu ukaba n’indahemuka,

utinda kurakara kandi ibyo waremye byose ubitegekana impuhwe.

2 Iyo twacumuye tugumya kuba abawe kuko tuzi ububasha bwawe,

nyamara ntituzacumura kuko tuzi ko turi abawe.

3 Koko kukumenya ubwabyo ni ubutungane bwuzuye,

kumenya ububasha bwawe ni isōko yo kudapfa.

4 Ntitwayobejwe n’ibikorwa bibi byahanzwe n’abantu,

ntitwayobejwe n’umurimo udafite agaciro w’abasīga amarangi,

ntitwayobejwe n’amashusho asize amabara anyuranye.

5 Amashusho abyutsa irari ry’abapfapfa,

atuma bararikira ishusho itagira ubuzima.

6 Abakora ayo mashusho bakayararikira kandi bakayasenga,

abo ni bo boramye mu bibi.

Ubupfapfa bw’abakora ibigirwamana

7 Umubumbyi ukāta ibumba afite umwete,

aribumbamo ibikoresho byo mu rugo,

muri iryo bumba kandi abumbamo ibikoresho by’ingirakamaro n’ibisanzwe.

Umubumbyi ubwe ni we ugena icyo buri kintu kizakora.

8 Hanyuma uwo mubumbyi atangira umurimo udafite akamaro,

muri rya bumba abumbamo ikigirwamana kitagira shinge na rugero,

uwo muntu ubumba icyo kigirwamana yavuye mu gitaka,

azagisubiramo bidatinze, igihe azaba yambuwe ubugingo yatijwe.

9 Uwo muntu ntatekereza ko ubuzima bwe ari bugufi,

ntajya atekereza ko azapfa nta kabuza,

arahiganwa n’abashongesha izahabu n’ifeza,

yigana abashongesha umuringa,

yirata ko abumba ibitagira shinge na rugero.

10 Umutima we umeze nk’ivu,

icyizere cye kirushwa agaciro n’umukungugu,

imibereho ye isuzuguritse kurusha ibumba.

11 Koko yasuzuguye Uwamuremye,

uwamuhumekeyemo umwuka w’ubuzima.

12 Kuri we ubuzima bwacu ni nk’umukino,

imibereho yacu ni nk’isoko rigamije inyungu.

Uwo muntu abona ko ari ngombwa gushakira inyungu muri byose nubwo byaba bibi.

13 Uwo mubumbyi ubumba ibigirwamana n’ibindi bikoresho bidakomeye,

arusha abandi kumenya ko acumura.

Ubupfapfa bw’Abanyamisiri bwo gusenga ibigirwamana

14 Nyamara Nyagasani, abo banzi bakandamije abantu bawe,

bose ni abapfapfa bikabije,

ibitekerezo byabo biri inyuma y’iby’abana bato.

15 Ibigirwamana byose by’amahanga babyita imana,

bifite amaso ariko ntibibona,

bifite amazuru ariko ntibihumeka,

bifite amatwi ariko ntibyumva,

bifite intoki ariko ntibikabakaba,

bifite amaguru ariko ntibigenda.

16 Koko byo ubwabyo byakozwe n’umuntu,

byabumbwe n’umuntu watijwe umwuka.

Nta muntu washobora kubumba imana isa nawe.

17 Uwo mubumbyi ni umuntu uzapfa,

ibyo akora na byo biba bipfuye.

Aruta kure ibyo bigirwamana asenga,

koko we afite ubuzima ariko byo ntibyabwigeze.

18 Abo bantu basenga ibikōko biteye ishozi,

ibikōko bigayitse kurusha ibindi.

19 Iyo ubigereranyije n’izindi nyamaswa, usanga nta bwiza bifite,

Imana ntiyigeze ibishima,

nta n’umugisha yabihaye.

Imana yagaburiye Abisiraheli iteza inzara Abanyamisiri

1 Abo bantu basengaga ibikōko,

byari bikwiye ko bahanishwa udukōko twinshi tukabajujubya.

2 Nyamara wowe Nyagasani, aho guhana abantu bawe wabagiriye imbabazi,

wabahaye inturumbutsi kugira ngo ubamare inzara,

ni byo byokurya byiza wabateguriye.

3 Abo bantu basengaga ibigirwamana nubwo bari bashonje,

batewe iseseme n’ibikōko biteye ishozi wabateje,

byatumye bazinukwa kugira icyo barya.

Naho abantu bawe bamaze gusonza igihe gito,

babonye ibyokurya byiza cyane.

4 Byari bikwiye ko abo babakandamizaga baterwa n’inzara idashira,

bityo abantu bawe bakibonera uburyo abanzi babo bajujubijwe.

Ibikōko byica n’inzoka y’umuringa

5 Igihe abantu bawe bari bugarijwe n’ibikōko biteye ubwoba,

igihe bicwaga n’inzoka zifite ubumara,

uburakari bwawe ntibwakomeje ngo bubarimbure.

6 Nyamara bababajwe igihe gito byo kubaburira,

hanyuma wabahaye ikimenyetso cy’agakiza,

wagiraga ngo ubibutse Amategeko yawe.

7 Koko uwarebaga icyo kimenyetso yarakiraga,

ariko ntiyabaga akijijwe n’icyo kimenyetso,

ahubwo yakizwaga nawe, wowe Mukiza w’abantu bose.

8 Ibyo byagaragarije abanzi bacu ko ari wowe ukiza abantu ikibi cyose.

9 Abanzi bacu barumwe n’inzige n’isazi barapfa,

bapfuye bazize kutabona umuti wabakiza,

koko bari bakwiriye guhanishwa udukōko nk’utwo.

10 Nyamara abantu bawe ntibarimbuwe n’inzoka zifite ubumara,

kubera impuhwe zawe warabagobotse urabakiza.

11 Wabateje inzoka zirabaruma kugira ngo ubibutse Amategeko yawe,

nyamara wabagobotse vuba kugira ngo batakwibagirwa burundu,

warabagobotse kugira ngo batibagirwa ubugiraneza bwawe.

12 Koko rero Nyagasani, nta muti uwo ari wo wose wabakijije,

ahubwo Ijambo ryawe ni ryo ryabakijije.

13 Ni wowe ufite ububasha ku buzima n’urupfu,

ni wowe ujyana abantu ikuzimu kandi ni wowe ubakurayo.

14 Umuntu ashobora kwica undi kubera ubugome,

nyamara ntashobora gusubiza ubuzima uwo yishe,

nta n’ubwo yashobora kumukura ikuzimu.

Urubura na manu

15 Nta muntu ushobora guhunga ububasha bwawe.

16 Abagome banze kukumenya wabahanishije ububasha bwawe,

barimbuwe n’imvura y’umurindi n’urubura,

barimbuwe n’inkubi y’umuyaga kandi batwikwa n’umuriro.

17 Uwo muriro warushagaho kugurumana,

igitangaje ni uko amazi atashoboye kuwuzimya,

koko ibyaremwe birengera intungane.

18 Hari ubwo umuriro wanyuzagamo ugacogora,

waracogoraga kugira ngo udatsemba ibikōko byatererejwe abagome,

ibyo byari ukubereka ko bakurikiranywe n’igihano cy’Imana.

19 Hari ubwo kandi umuriro wagurumanaga cyane,

waragurumanaga cyane nubwo wari mu mazi,

waragurumanaga kugira ngo utsembe imyaka yo muri icyo gihugu cy’abagome.

Imana Iha Abisiraheli Manu

20 Nyamara abantu bawe wabahaye ibyokurya by’abamarayika,

aho uri mu ijuru wabahaye umugati uteguwe neza bataruhiye,

umugati ufite uburyohe bwose kandi unogeye bose.

21 Ibyokurya wabahaga byagaragazaga ubugwaneza ugirira abana bawe,

koko byabaga binogeye uwabiryaga,

byamereraga buri wese uko abyifuza.

22 Ibyo byokurya nubwo byasaga n’amasimbi cyangwa urubura,

umuriro ntiwigeze ubishongesha.

Byatumye abantu bawe bamenya uko umuriro watsembye imyaka y’abanzi babo,

ibyo byabaye mu gihe cya ya nkubi y’umuyaga n’imvura y’amahindu.

23 Uwo muriro wagabanyaga ubukana bwawo,

warabugabanyaga kugira ngo intungane zibone ibizitunga.

24 Ibyaremwe byiteguye kugukorera wowe Muremyi wabyo,

birivumbagatanya kugira ngo abagome bahanwe,

nyamara biracururuka kugira ngo bigirire neza abakwiringira.

25 Ni yo mpamvu muri uko guhinduka ukundi,

byari byiteguye kuba igikoresho cy’ubuntu bwawe,

ubuntu bwawe bwo kugaburira abantu bose uko babyifuza.

26 Nyagasani, ibyo byabereye kwigisha abana bawe ukunda,

byabereye kubumvisha ko abantu badatungwa gusa n’ibyo bahinze,

nyamara ko ijambo ryawe ari ryo ribeshaho abakwemera.

27 Koko ikitangizwaga n’umuriro cyashongeshwaga n’imirase yoroheje y’izuba,

28 washakaga kubamenyesha ko bagomba kugusingiza izuba ritararasa,

wabamenyeshaga ko bagomba kugusenga bugicya.

29 Koko rero icyizere cy’indashima kizayoyoka nk’urume,

kizapfa ubusa nk’amazi adafite akamaro.

Umwijima n’inkingi y’umuriro

1 Nyagasani, imiginzereze yawe ni intagereranywa,

ni intagereranywa kandi biragoye kuyisobanukirwa,

ni na yo mpamvu abapfapfa bayobye.

2 Abagome bibwiye ko bakandamije ubwoko witoranyirije,

baheze mu mwijima no mu ijoro ridacya,

bafungiwe mu mazu yabo bavutswa urukundo rwawe ruhoraho.

3 Bibwiraga ko ibyaha bakoreye mu ibanga bizibagirana ntibigaragare,

nyamara baratatanye bagira ubwoba bwinshi,

bakangaranyijwe na za baringa.

4 Aho bahungiye ntihababujije kugira ubwoba,

bumvaga urusaku rukabije hirya no hino,

babonaga za baringa zishavuye kandi ziteye ubwoba.

5 Umuriro ntiwashoboraga kubamurikira,

urumuri rw’inyenyeri na rwo ntirwashoboraga kumurikira iryo joro riteye ubwoba.

6 Bamurikirwaga gusa n’umuriro wiyatsaga ubwawo,

barawubonaga bikabatera ubwoba,

iyo bamaraga kuwubona bakomezaga gukangarana,

basangaga ibyo bamaze kubona biteye ubwoba kuruta uko babikekaga.

7 Amayeri y’abapfumu nta cyo yari akimaze,

ubuhanga bwose biratanaga bwabakojeje isoni.

8 Abibwiraga ko bashobora kumara abantu ubwoba n’imitima ihagaze,

abo na bo bari bafite ubwoba budafite ishingiro.

9 Nubwo nta kintu gikanganye cyabaga gihari ngo kibatere ubwoba,

umuvuduko w’udusimba n’urusaku rw’ibikururuka hasi,

ibyo byonyine byari bihagije kugira ngo bakangarane.

10 Bahindaga umushyitsi bakicwa n’ubwoba,

ntibatinyukaga no kureba uwo mwijima badashobora kwigobotora.

11 Koko ubugome bugaragaza ububwa kandi bwicira urubanza,

nubwo umutimanama ubushinja buhora bugambiriye ikibi.

12 Ubwoba rero si ikindi,

ni ukubura ubwenge butekereza.

13 Uko umuntu agenda abura ibitekerezo bishyitse,

ni ko arushaho kutamenya ibituma ahagarika umutima.

14 Abo bantu muri iryo joro riteye ubwoba,

ijoro ritewe n’ikuzimu hateye ubwoba,

bose ntibabashaga gusinzira.

15 Bikangaga za baringa zibatera ubwoba,

ubundi bakazikama bitewe no gucika intege,

koko bari batashywe n’ubwoba budasanzwe.

16 Bityo uwabaga ari aho yikubitaga hasi,

yameraga nk’ufungiye muri gereza idafungurwa.

17 Yaba umuhinzi, umushumba cyangwa umuntu ufite akazi mu cyaro,

buri wese yagwirirwaga n’icyago adashobora kwigobotora.

18 Koko bose bari ku ngoyi y’umwijima,

iyo bumvaga umuyaga uhuha,

iyo bumvaga indirimbo nziza z’inyoni mu mashami y’ibiti,

iyo bumvaga amazi asuma,

19 iyo bumvaga urusaku rw’amabuye akocagurana,

iyo bumvaga imirindi y’inyamaswa zisimbagurika,

iyo bumvaga umworomo w’ibikōko by’inkazi,

iyo bumvaga nyiramubande yo mu bikombe by’imisozi,

ibyo byose byabateraga ubwoba.

20 Nyamara isi yose yari imurikiwe n’umucyo urabagirana,

buri wese yakoraga umurimo we nta nkomyi.

21 Abo bonyine ni bo bari babundikiwe n’umwijima,

uwo mwijima wari umeze nk’uzababundikira bapfuye,

ariko ishavu bari bafite ryari ribaremereye kurusha umwijima.

Inkingi y’umuriro

1 Icyo gihe abantu bawe bari bamurikiwe n’umucyo urabagirana,

abanzi babo bumvaga ijwi ryabo ariko ntibababone,

bavugaga ko bo bahiriwe kuko batakibabara.

2 Bashimiraga abantu bawe ko batihōreye kubera inabi bagiriwe,

babasabye imbabazi z’uko babarwanyije.

3 Abantu bawe ntibagumye mu mwijima,

wabahaye inkingi y’umurirongo ibayobore inzira batari bazi,

iyo nkingi yari imeze nk’izuba ryoroheje ryabayoboraga mu rugendo ruhire.

4 Nyamara abanzi babo bari bakwiye kuguma mu mwijima,

koko bari baragize imfungwa abantu bawe,

abantu bawe bagombaga guha isi urumuri rudashira rw’Amategeko yawe.

Ijoro ry’ibyago ari ryo ry’agakiza

5 Abo banzi bari bagambiriye kwica abana bato b’abantu bawe,

umwe muri bo yarabagabijwe ariko ararokoka.

Wabahanishije kwica benshi mu bana babo,

wabaroheye icyarimwe mu mazi y’umuvumba ukaze.

6 Nyamara ba sogokuruza bari barabwiwe mbere y’igihe iby’iryo joro,

barabibwiwe kugira ngo banezezwe n’amasezerano wabasezeranyije.

7 Abantu bawe bari bazi ko intungane zagombaga gukizwa muri iryo joro,

bari bazi kandi ko abanzi babo bagombaga kurimbuka.

8 Koko rero ku bw’icyo gikorwa wahannye abanzi bacu,

bityo natwe uduhesha ikuzo kandi uduhamagarira kuba abawe.

9 Abakwiyeguriye bakomoka ku ntungane batambaga ibitambo mu ibanga,

bashyiraga hamwe bagakurikiza Amategeko y’Imana,

ayo Mategeko yabatozaga gusangira amahirwe n’ibyago,

baririmbaga indirimbo z’ibisingizo za ba sekuruza.

10 Nyamara urusaku rw’amajwi anyuranye y’abanzi babo rwumvikanaga hose,

baririraga abana babo bapfuye.

11 Inkoreragahato na shebuja bahanwaga kimwe,

umuturage usanzwe akababara kimwe n’umwami.

12 Bose bari bapfushije abantu batagira ingano bazize urupfu rumwe,

abarokotse ntibari bagihagije kugira ngo bahambe abapfuye,

koko abana babo bakunzwe cyane bari barimbutse mu kanya gato.

13 Abo bantu ntibitaye ku miburo,

bishingikirije ububasha bw’abapfumu babo,

nyamara babonye abana babo b’impfura barimbutse,

ni bwo bamenye ko Abisiraheli ari abana b’Imana.

14 Icyo gihe ijoro ryari ririmbanyije,

ahantu hose harangwaga ituze.

15 Ako kanya ijambo ryawe rifite ububasha riva mu ijuru ku ntebe ya cyami,

ryaje nk’umurwanyi w’intwari rimanukira mu gihugu cyavumwe,

16 ryaje ryitwaje amabwiriza yawe nk’inkota ityaye.

Ryari rihagaze ku isi rikora ku ijuru,

ryujuje imirambo ku isi hose.

17 Ako kanya abo bantu barota inzozi zibakura umutima,

bityo batahwa n’ubwoba bwinshi.

18 Buri muntu arambarara iruhande rw’undi ameze nk’uwapfuye,

basambagurikaga bavuga icyo bazize.

19 Koko izo nzozi zari zabamenyesheje icyo bazize,

bagombaga kumenya icyo bazize mbere yo gupfa.

Aroni agoboka Abisiraheli bari mu butayu

20 Urwo rupfu rwageze no ku ntungane,

abantu benshi barimbukiye mu butayu,

nyamara uburakari bwawe ntibwamaze igihe kirekire.

21 Koko umuntu w’indakemwa yihutiye kubagoboka,

yakoresheje intwaro z’umurimo we,

izo ntwaro ni isengesho n’umubavu w’igitambo gihongerera ibyaha,

yacubije ubwo burakari maze icyago kirashira,

yerekanye atyo ko ari umugaragu wawe.

22 Yatsinze ubukana atari ku bw’imbaraga z’umubiri,

yabutsinze adakoresheje intwaro,

ijambo ni ryo yakoresheje ahagarika umurimbizi,

yibukije indahiro n’amasezerano byagiriwe ba sokuruza.

23 Icyo gihe intumbi zakomezaga kugwira,

uwo muntu arahagoboka ahagarika icyo cyorezo,

yaragihagaritse kugira ngo kitagera no ku bakiri bazima.

24 Ku ikanzu ye ndende hari hashushanyijeho isi yose,

amazina y’ikuzo ya ba sekuruza yari yanditswe ku mirongo ine y’amabuye yari ayitatsweho,

yari atamirije igitambaro gitatsweho ikuzo ry’Imana.

25 Umurimbuzi yarabibonye agira ubwoba asubira inyuma,

koko uburakari wabarakariye bwonyine bwari buhagije.

Abisiraheli bambuka Inyanja itukura

1 Abo bagome wakomeje kubarakarira,

koko Nyagasani wari usanzwe uzi ibyo bagambiriye gukora,

2 wari uzi ko bazahatira abantu bawe kugenda,

wari uzi kandi ko bazisubiraho bakabakurikirana.

3 Koko rero igihe Abanyamisiri bari bakiri mu cyunamo,

igihe bajyaga ku mva kuririra ababo bapfuye,

bibagiwe ibyababayeho bisubiraho,

bakurikiranye abo bari bahatiye kugenda nk’aho ari impunzi.

4 Igihano bari bateganyirijwe cyabateye gukora icyo gikorwa kibi cyane,

icyo gikorwa cyatumye bibagirwa ibyababayeho,

imibabaro yabo bayongeyeho ikindi gihano.

5 Igihe abantu bawe bari mu rugendo rutangaje,

abanzi babo bo bagwiririwe n’urupfu rudasanzwe.

Imana Iyobora kandi Ikarinda ubwoko bwayo

6 Ku bw’Itegeko ryawe ibiremwa byose byaravuguruwe,

byaravuguruwe kugira ngo urinde abantu bawe ikibi.

7 Babonye igicu kibarinda gitwikiriye inkambi zabo,

ahari amazi hahinduka ubutaka bwumutse,

mu Nyanja itukura hahinduka inzira nyabagendwa,

ahari imivumba hahinduka ikibaya gitoshye.

8 Aho ni ho abantu bawe bose banyuze barinzwe nawe,

biboneye ibikorwa byawe bitangaje.

9 Bari bameze nk’amafarasi ari mu rwuri,

bikinaguraga nk’abana b’intama bagusingiza,

Nyagasani, baragusingizaga wowe Mukiza wabo.

10 Bibutse ibyabaye bakiri mu gihugu cy’amahanga:

ubutaka bwavubuye imibu aho kuvubura amatungo,

uruzi rwavubuye imitubu myinshi aho kuvubura amafi.

11 Hanyuma babona hadutse inyoni zidasanzwe,

inzara yarabarembeje bifuza ibyokurya biryoshye,

12 wabavuburiye inturumbutsi mu nyanja kugira ngo ubanezeze.

Igihano cyahawe Abanyamisiri

13 Nyamara abo bagome barahanwe,

bahanwe bamaze kubona ibimenyetso by’imirabyo y’inkuba.

Abo bantu bahanishijwe igihano gikwiranye n’ubugome bwabo,

koko bagaragaje ko banga abanyamahanga urunuka.

14 Abanyasodoma na bo bigeze kwanga kwakira abagenzi baje babagana,

aho kubakira bagize inkoreragahato ababagiriye neza.

15 Abo bantu bazahanwa nta kabuza,

bazahanirwa ko bakiranye ubugome abanyamahanga.

16 Nubwo Abanyamisiri bakiranye Abisiraheli ibyishimo,

babakiriye nk’abafite uburenganzira bumwe,

nyamara babirenzeho babicisha imirimo y’agahato.

17 Ni yo mpamvu bafashwe n’ubuhumyi,

babaye nka ba Banyasodoma binjiye mu nzu y’intungane,

bagoswe n’umwijima w’icuraburindi,

buri wese yashakashatse aho yasohokera.

Imana irema imibereho mishya

18 Inanga y’indoha igira imirya myinshi buri murya ukagira ijwi ryawo,

nyamara buri jwi rijyana n’andi bikaba amajwi anyuranye.

Uko ni ko byari bimeze muri iyo minsi,

igihe ibyaremwe byongeye gushyirwa hamwe.

Ibyo byakumvikana umuntu ahereye ku byabaye:

19 inyamaswa zari imusozi zagiye mu mazi,

izari mu mazi zagiye imusozi,

20 umuriro warushijeho kugurumana mu mazi,

amazi ntiyashoboye kuwuzimya.

21 Uwo muriro ntiwashoboye gutwika inyamaswa zawunyuragamo,

ntiwashoboye gushongesha ibyokurya bitanzwe n’Imana,

ibyokurya byari bimeze nk’urubura rushonga bitaruhanyije.

Umwanzuro

22 Nyagasani, koko wahaye abantu bawe ikuzo n’icyubahiro,

ntiwahwemye kubafasha igihe cyose n’ahantu hose.