Category: Habakuki

1 Ngiyi imiburo umuhanuzi Habakuki yahishuriwe.

Habakuki araharanira ubutabera

2 Uhoraho, ko utanyumva,

mbese nzagutabaza ngeze ryari?

Ndagutakambira kubera urugomo ruriho,

nyamara ntawe urengera.

3 Kuki utuma ndeba ubugome buriho?

Nawe kuki urēbēra abarengana?

Nta kindi nkibona atari urugomo n’ibintu birimbuka,

impaka n’amahane biri hose!

4 Ni cyo gituma amategeko yarapfukiranywe,

ntaho ubutabera bukirangwa,

abagome baryamira intungane,

bityo bagoreka ubutabera.

Igisubizo cy’Uhoraho

5 Uhoraho aravuga ati:

“Nimwitegereze amahanga maze mutangare!

Muri iki gihe cyanyu hagiye gukorwa igitangaza,

ntimuzacyemera nubwo hagira ukibabwira.

6 Dore mpagurukije Abanyababiloniya,

ni ubwoko bw’inkazi kandi buhutiraho,

bazatera isi yose bigarurire ibindi bihugu.

7 Ni abantu bateye ubwoba kandi batinyitse,

ni abirasi bishyiriraho ayabo mategeko.

8 Amafarasi yabo arusha ingwe kunyaruka,

abayagenderaho ni inkazi kurusha amasega agiye guhīga,

amafarasi si ukugenda araguruka.

Abayagenderaho baturuka iyo bigwa,

baza bagendera mu birere nka kagoma irabutswe inyama.

9 Bose bagenzwa n’ibikorwa by’urugomo,

bagenda būhanya bagana imbere,

bafata abantu benshi nk’umusenyi.

10 Abanyababiloniya basuzugura abami,

banegura abategetsi.

Ntibakangwa n’ibigo ntamenwa,

batinda igitaka cyo kuririraho bakigarurira ibyo bigo.

11 Banyaruka nk’umuyaga,

aho banyuze bagenda bakora ibibi,

imbaraga zabo bazigize imana yabo!”

Habakuki yongera gutakambira Uhoraho

12 Uhoraho, uriho kuva kera kose,

Mana yanjye, nta nenge ugira,

ntuzatuma dupfa!

Uhoraho, wahagurukije Abanyababiloniya ngo barangize imanza waduciriye,

Rutare mpungiraho, wabashyizeho ngo baduhane.

13 Uri intungane ntiwihanganira ubugome,

ntubasha kurēbēra abarengana,

none se kuki urēbēra abagambanyi?

Kuki abagome batsemba ababarusha gutungana ukicecekera?

14 Ureka abantu waremye bakamera nk’amafi yo mu nyanja,

bamera nk’ibikōko byo mu mazi bitagira umuyobozi.

15 Abanyababiloniya bakacira abantu bose nk’abafatisha amafi ururobo,

babafata nk’ufata amafi mu rushundura,

babakoranya nk’amafi ari mu mutego,

ibyo bituma bishima bakanezerwa.

16 Iyo mitego yabo bayitambira ibitambo,

bosereza imibavu inshundura zabo,

ni byo bakesha ibyokurya byinshi kandi biryoshye.

17 Mbese bazageza he gutega imitego?

Bazagumya gutsemba amahanga nta mbabazi!

Uhoraho asubiza Habakuki

1 Ngiye gukomera ku murimo wanjye wo kuba maso,

ngiye guhagarara ku munara w’igenzura,

ngiye guhanga amaso ku Uhoraho ntegereze icyo ambwira,

mbese nzasubiza iki abanyitotombera?

2 Uhoraho ni ko kunsubiza ati:

“Andika icyo nkwereka,

ucyandike ku bisate by’amabuye ku buryo busomeka,

bityo umuntu wese abashe kucyisomera adategwa.

3 Icyo nkwereka kizasohozwa igihe kigeze,

kirihutirwa kizagera ku iherezo nta kabuza,

nubwo byatinda ugitegereze kizaza,

koko igihe nagennye kizaza.

4 Andika uti:

‘Umwirasi yishyira hejuru kandi ataboneye na busa,

nyamara intungane izabeshwaho n’ubudahemuka bwayo.’

Abanyababiloniya bazahanwa

5 Abanyagasuzuguro si abo kwizerwa,

abirasi ntibajya batuza,

ntibigera banyurwa,

bameze nk’ikuzimu hadahāga abapfa!

Bigarurira amahanga yose,

amoko yose bayagira ayabo.”

6 Abantu bo muri ayo mahanga bazabagira iciro ry’imigani,

bazabanegura babakobe bati:

“Bazabona ishyano abarundanya ibitari ibyabo!

Mbese bazakungahazwa n’ibyo bambuye abandi bageze ryari?”

7 Namwe ababishyuza ibyabo bazabahagurukira,

bazaza babatere ubwoba babajyane ho iminyago.

8 Mwasahuye amahanga menshi,

namwe amoko yandi yose azabasahura.

Koko mwamennye amaraso menshi,

mwakandamije ibihugu n’imijyi n’ababituye.

9 Bazabona ishyano abubakisha amazu yabo ibyibano!

Barayubaka bakayakomeza bakibwira ko nta cyabatera.

10 Nyamara imigambi yanyu izatuma mukorwa n’isoni!

Uko mwatsembye amahanga menshi namwe ni ko muzicwa.

11 Amabuye yubatse inkuta azasakuza abarege,

mwikorezi na zo zizayashyigikira!

12 Bazabona ishyano abubakisha umurwa wabo ibyavuye ku bwicanyi!

Bakomeresha imijyi yabo ibyo bakuye mu bugome!

13 Nyamara ibyo amahanga agokera bizatwikwa,

ibyo amoko avunikira ni ukurushywa n’ubusa.

Mbese ibyo si Uhoraho Nyiringabo utuma bikorwa?

14 Koko isi izuzuzwa kumenya ikuzo ry’Uhoraho,

izuzuzwa nk’uko inyanja zisendera amazi.

15 Bazabona ishyano abuhira inzoga abaturanyi babo!

Mubaha izivanze kugira ngo zibasindishe,

bityo mushimishwa no kubareba bambaye ubusa!

16 Aho guhabwa ikuzo muzakorwa n’isoni.

Uhoraho azabuhira igikombe cy’uburakaribwe,

ngaho namwe nimunywe zibateshe ibyo mwambaye,

bityo ikuzo ryanyu rizasimburwa no gukorwa n’isoni.

17 Ibibi mwakoreye Abanyalibani bizabagaruka,

mwishe inyamaswa nyinshi,

none inyamaswa zizahora zibatera ubwoba!

Koko mwamennye amaraso y’abantu benshi,

mwakandamije ibihugu n’imijyi n’ababituye.

18 Mbese amashusho asengwa amaze iki?

Ese si abantu bayakora?

Mbese si ayo kubeshya abantu gusa?

Bagirira icyizere ibigirwamana bitavuga,

kandi ari bo babyiremera!

19 Bazabona ishyano ababwira ingiga y’igiti bati: “Kanguka!”

Babwira n’ibuye ritabasha kuvuga bati: “Byuka!”

Mbese ibyo bigirwamana hari icyo byigisha?

Biyagirijweho izahabu n’ifeza,

nyamara nta mwuka ubirimo.

20 Uhoraho we aganje mu Ngoro ye nziranenge,

abatuye isi bose nibacecekere imbere ye.

Isengesho rya Habakuki

1 Ngiri isengesho ry’umuhanuzi Habakuki, riririmbwa ku buryo bw’amaganya.

2 Uhoraho, numvise ibigwi byawe,

Uhoraho, ibitangaza wakoze byanteye ubwoba.

Muri ibi bihe byacu ongera ukore ibitangaza wajyaga ukora,

muri ibi bihe byacu ujye ubitugaragariza.

Nubwo warakara ujye utugirira imbabazi.

3 Dore Imana nziranenge iturutse i Temani,

inyuze ku musozi wa Parani.

Kuruhuka

Ikuzo ryayo risesuye ijuru,

isi yuzuye ishimwe ry’abayisingiza!

4 Irabagirana nk’urumuri,

imirasire ibiri nk’iy’izuba ituruka mu kiganza cyayo,

ni na ho ububasha bwayo buboneka.

5 Ibyorezo biyigenda imbere,

aho inyuze hasigara indwara.

6 Irahaguruka isi igatingita,

irareba amahanga agashya ubwoba.

Imisozi yabayeho kuva kera icika inkangu,

udusozi twa kera turīka,

iyo ni yo migenzereze yayo kuva kera kose!

7 Nabonye Abakushani bagwije umubabaro mu mahema yabo,

Abamidiyani bahindiye umushyitsi aho batuye.

8 Uhoraho, mbese warakariye inzūzi?

Mbese inzūzi ni zo zigutera umujinya?

Cyangwa se warakariye inyanja?

Waje ku bicu nk’ugendera ku ifarasi,

wagiye gutsinda abanzi nk’ugendera mu igare ry’intambara.

9 Umuheto wawe wawusohoye mu ntagara,

indahiro yawe ni yo myambi urashisha.

Kuruhuka

Watumye isi yiyasa imigezi iratemba,

10 imisozi yarakurabutswe iratingita,

amazi ahurura arahita,

inyanja irahorera,

imihengeri yiteragura hejuru.

11 Izuba n’ukwezi byahagaraye aho byari bigeze,

byari bikanzwe n’umucyo w’imyambi yawe,

byari bikanzwe n’icumu ryawe rigenda rirabagirana.

12 Watambagiye isi ufite umujinya,

waribase amahanga ufite uburakari.

13 Wazanywe no gutabara ubwoko bwawe,

wazanywe no gutabara umwami watoranyije.

Wishe umuyobozi w’igihugu cy’abagome,

waramushinyaguriye uramucuza,

Kuruhuka

14 wamurashishije imyambi ye bwite.

Abanzi baduteye bihuta nka serwakira,

bishimiye guca ibico byo gutsemba abanyabyago.

15 Wavogereye inyanjauri ku mafarasi yawe,

watumye imihengeri yayo yitera hejuru.

16 Ibyo byose narabyumvise nkuka umutima,

numvise urusaku rwabyo amenyo arakomangana,

nacitse intege ndadagadwa,

amaguru yanjye yahinze umushyitsi.

Reka nicecekere ntegereze:

igihe kizagera Imana ihane abadutera.

17 Nubwo imitini itarabya,

nubwo imizabibu itakwera,

nubwo iminzenze yarumba,

nubwo imirima itatanga umusaruro,

nubwo intama n’ihene zashira mu biraro,

nubwo inka zashira mu bikumba,

18 sinzabura kwishimira Uhoraho,

nzanezezwa n’Imana Umukiza wanjye!

19 Nyagasani Uhoraho ni we untera imbaraga,

antambagiza ahirengeye,

ampa kugenda nk’imparakazi nta mpungenge.

Indirimbo y’umuyobozi w’abaririmbyi, iririmbwa hacurangwa umurya w’inanga.