Category: Ezayi

Ingoma y’amahoro

1 Umwami azaba nk’umushibu ushibutse ku gishyitsi cya Yese,

azaba nk’ishami rirumbutse ryameze ku mizi yacyo.

2 Mwuka w’Uhoraho azahorana n’uwo mwami,

ni Mwuka utanga ubwenge n’ubushishozi,

ni Mwuka utanga inama n’ubutwari,

ni Mwuka utuma bamenya Uhoraho bakamwubaha.

3 Mwuka azatoza uwo mwami kubaha Uhoraho,

uwo mwami ntazaca urubanza ashingiye ku gihagararo,

ntazaruca ashingiye ku mabwire.

4 Abatishoboye azabacira imanza zitabera,

abakene bo mu gihugu azabarenganura,

azavuga ijambo abatuye igihugu bahanwe,

abagizi ba nabi azabicisha umwuka wo mu kanwa ke.

5 Abantu be azabayoborana ubutungane,

azabayoborana ubudakemwa.

6 Isega izaturana n’umwana w’intama,

ingwe izabyagira hamwe n’umwana w’ihene,

inyana n’icyana cy’intare bizarisha hamwe,

umwana muto azabiragira.

7 Inka n’ikirura bizarisha hamwe,

inyana n’ibyana by’intare bizabyagira hamwe,

intare izarisha ubwatsi nk’ikimasa.

8 Umwana uri ku ibere azakinira ku mwobo w’impiri,

umwana w’incuke azashyira akaboko mu mwobo w’incira.

9 Ubugizi bwa nabi cyangwa ubwangizi ntibizarangwa ku musozi w’Uhoraho,

koko isi izuzuzwa kumenya ikuzo ry’Uhoraho,

izaryuzuzwa nk’uko inyanja zisendera amazi.

Itahuka ry’abajyanywe ho iminyago

10 Ukomoka kuri Yese azaba nk’ibendera ry’ibihugu,

amahanga azamuyoboka,

aho azatura hazahabwa ikuzo.

11 Icyo gihe Nyagasani azongera akoreshe ububasha bwe,

azagarura itsinda ry’abo mu bwoko bwe basigaye,

abazaba basigaye muri Ashūru no mu Misiri n’i Patirosi n’i Kushi,

abazaba basigaye muri Elamu no muri Babiloniya,

i Hamati no mu turere twegereye inyanja.

12 Azazamura ibendera riburira amahanga,

azayagaragariza ko agiye gukoranya abajyanywe ho iminyago ba Isiraheli,

azakoranya Abayuda abakuye mu mpande enye z’isi.

13 Ishyari ry’Abisiraheli rizashira,

abanzi b’u Buyuda ntibazongera kubutera,

Abisiraheli ntibazongera kugirira ishyari Abayuda,

Abayuda na bo ntibazongera gutera Abisiraheli.

14 Abayuda n’Abisiraheli bazifatanya batere u Bufilisiti,

bazifatanya batware abantu b’iburasirazuba ho iminyago,

bazatsinda Abedomu n’Abamowabu,

Abamoni na bo bazabayoboka.

15 Uhoraho azakamya Inyanja itukura,

azakamya uruzi rwa Efurati akoresheje inkubi y’umuyaga,

bityo azarugabanyamo utugezi turindwi twambukwa n’amaguru.

16 Hazaba inzira y’itsinda ry’abasigaye mu bwoko bwe,

abazaba basigaye muri Ashūru.

Ni na ko byagenze ku Bisiraheli ubwo bavaga mu Misiri.

Gusingiza Imana Umukiza

1 Icyo gihe uzavuga uti:

“Uhoraho ndagushimiye,

ndagushimiye nubwo wari warandakariye,

uburakari bwawe bwarashize urampumuriza.

2 Imana ni yo gakiza kanjye,

ndayiringiye sinkigira ubwoba,

Uhoraho ni we mbaraga zanjye ndamusingiza,

koko ni we wankijije.”

3 Muzavoma amazi munezerewe,

muzayavoma ku masōko y’agakiza.

4 Icyo gihe muzavuga muti:

“Nimushimire Uhoraho mwambaze izina rye,

nimwamamaze mu mahanga yose ibyo yakoze,

nimwamamaze hose izina rye ritangaje.

5 Nimuririmbire Uhoraho kuko yakoze ibitangaje,

nimubimenyekanishe ku isi hose.”

6 Abatuye Siyoni nimurangurure amajwi,

nimuririmbe munezerewe,

koko ukora ibikomeye muri mwe,

uwo ni we Mana Nziranenge ya Isiraheli.

Isenyuka rya Babiloni

1 Ubu ni ubutumwa bwahawe Ezayi mwene Amotsi bwagenewe Babiloni.

2 Uhoraho aravuze ati:

“Ku musozi w’ibiharabuge nimuhashinge ibendera,

nimurangurure ijwi muhamagare ingabo,

nimuzihamagare zinjire mu ngo z’abanyacyubahiro.

3 Nategetse abanyiyeguriye,

nahamagaye ingabo zanjye z’intwari,

nahamagaye abishimira ugutsinda kwanjye,

ni bo bazasohoza umugambi w’uburakari bwanjye.”

4 Nimwumve urusaku ku misozi,

ni urusaku rumeze nk’urw’abantu benshi,

nimwumve umworomo w’ibihugu,

ni umworomo umeze nk’uw’amahanga yishyize hamwe.

Uhoraho Nyiringabo arategura ingabo zigiye ku rugamba.

5 Zivuye iyo gihera mu bihugu bya kure,

Uhoraho yitwaje intwaro z’uburakari bwe,

aje gutsemba igihugu cyose.

6 Nimucure umuborogo kuko umunsi w’Uhoraho wegereje,

uzaza umeze nka kirimbuzi uturutse kuri Nyiringabo.

7 Ni yo mpamvu amaboko yose azatentebuka,

abantu bose bazacika intege.

8 Dore bazakangarana,

bazagira umubabaro n’uburibwe,

bazamera nk’umugore ufite ibise,

bazarebana bumirwe, bakorwe n’isoni.

9 Dore umunsi w’Uhoraho uraje,

ni umunsi uteye ubwoba wuzuye uburakari n’umujinya,

igihugu kizarimburwa, abanyabyaha bagituyemo bazatsembwa.

10 Inyenyeri zo ku ijuru ntizizamurika,

izuba rizazima rikirasa,

ukwezi na ko ntikuzongera kumurika.

11 Uhoraho aravuze ati:

“Nzahana isi kubera ubugizi bwa nabi buyirangwamo,

nzahana abagome kubera ibicumuro byabo,

nzatsemba abanyagasuzuguro bishyira hejuru,

nzacisha bugufi abirasi.

12 Nzatubya abantu babe ingume kurusha izahabu inoze,

bazaba ingume kurusha izahabu ivuye muri Ofiri.”

13 Koko rero ijuru rizahubangana, isi ihinde umushyitsi,

uzaba ari umunsi w’uburakari bukaze bw’Uhoraho Nyiringabo.

14 Bazamera nk’isha ikurikiwe n’umuhigi,

bazaba nk’intama zitagira umushumba,

buri muntu azasubira iwabo,

buri wese azahungira mu gihugu cye.

15 Abo bazabona bose bazabicisha imyambi,

abo bazafata bose bazabicisha inkota.

16 Ibibondo byabo bizicirwa mu maso yabo,

amazu yabo azasahurwa,

abagore babo bazafatwa ku ngufu.

17 Uhoraho aravuga ati:

“Ngiye kubateza Abamedi,

abantu batitaye ku ifeza n’izahabu.

18 Bazicisha imyambi abasore b’i Babiloni,

ntibazababarira abana,

ntibazagirira impuhwe impinja.”

19 Babiloniya yari umutāko w’ibihugu,

yari ikuzo ry’Abanyababiloniya,

Imana izayisenya nka Sodoma na Gomora.

20 Koko ntizongera guturwa bibaho,

ntizongera guturwa uko ibihe biha ibindi.

Abagenzi b’Abarabu ntibazahashinga amahema yabo,

abashumba ntibazahabyagiza amatungo yabo.

21 Inyamaswa zizahagira amasenga yazo,

ibihunyira na za mbuni bizahatura,

ibikōko bizahidagadurira.

22 Impyisi zizahumira mu mazu ntamenwa,

nyiramuhari zizamokera mu mazu yabo meza.

Igihe cya Babiloni kirageze,

iminsi yayo irarangiye.

Abajyanywe ho iminyago batahuka

1 Uhoraho azagirira impuhwe urubyaro rwa Yakobo, azongera yihitiremo Abisiraheli. Azabagarura mu gihugu cyabo, abanyamahanga bazaza babagana bifatanye n’Abisiraheli.

2 Ibihugu byinshi by’amahanga bizishingira kugarura Abisiraheli mu gihugu cyabo. Abisiraheli nibagera mu gihugu Uhoraho yabahaye, abo banyamahanga bazababera inkoreragahato. Abari barakandamije Isiraheli na yo izabakandamiza, izategeka kandi abari barayigaruriye.

Urupfu rw’Umwami w’i Babiloni

3 Isiraheli, Uhoraho namara kugusubiza umutekano, nyuma y’imibabaro n’amakuba n’imirimo y’agahato wakoreshwaga,

4 uzaririmbire umwami w’i Babiloni iyi indirimbo imukwena:

Bishoboka bite se ko umunyagitugu yapfa?

Gukandamiza bigiye nk’ifuni iheze!

5 Uhoraho avunaguye inkoni z’abagome,

acagaguye ikiboko cy’abanyagitugu,

6 inkoni bakubitishaga abantu n’umujinya,

babakubitaga ubudahwema,

inkoni bategekeshaga amahanga n’uburakari,

bayategekeshaga nta mbabazi.

7 Bityo ibihugu byose bifite umutekano n’amahoro,

abantu bararirimbana umunezero.

8 Amasipure yishimiye urupfu rwawe,

amasederi yo muri Libani na yo aravuga ati:

“Ubwo apfuye nta wuzongera kudutema.”

9 Ab’ikuzimu na bo biteguye kwakira umwami w’i Babiloni,

bakanguye abapfuye bose bahoze ari ibikomerezwa ku isi,

bahagurukije abami bose b’amahanga ku ntebe zabo.

10 Bose bafashe ijambo bagira bati:

“Nawe ubaye umunyantegenke kimwe natwe!”

11 Icyubahiro n’amajwi y’inanga byawe byagiye ikuzimu,

bityo uzabora uhinduke inyo.

12 Mbese wahanantutse ute mu ijuru,

wowe nyenyeri irabagirana mu rukerera?

Wajugunywe ute ku isi, wowe wigeze gutsinda amahanga?

13 Waribwiraga uti:

“Nzazamuka ngere mu ijuru,

intebe yanjye nzayishyira hejuru y’inyenyeri ziri kure y’izindi,

nzaganza ku musozi w’ikoraniro, ahagana mu majyaruguru.

14 Nzazamuka ngere hejuru y’ibicu,

nzareshya n’Imana Isumbabyose.”

15 Nyamara dore wahananturiwe ikuzimu,

washyizwe mu rwobo hasi cyane.

16 Abakubona barakwitegereza cyane,

baguhanze amaso ubudahumbya bibaza bati:

“Mbese uyu ni wa muntu wahindishaga ab’isi umushyitsi,

wa wundi wateraga ubwoba ibihugu,

17 wa muntu wahinduye isi ubutayu,

wa wundi warimbuye imijyi,

wanze kurekura imfungwa kugira ngo zisubire iwabo?”

18 Koko rero, abami bose b’amahanga bahambanwa icyubahiro,

buri wese ashyingurwa mu mva ye.

19 Nyamara wowe wajugunywe hanze y’imva yawe,

wajugunywe nk’ishami riteye ishozi,

wageretsweho imirambo y’abicishijwe inkota,

wajugunywe mu mabuye y’ikuzimu,

wahindutse nk’intumbi yanyukanyutswe.

20 Ntuzahambwa nk’abandi bami,

koko rero washenye igihugu cyawe,

wishe kandi abantu bawe.

Urubyaro rwawe rw’abagome ntiruzibukwa ukundi.

21 Nimwitegure kwica abana babo mubaziza ubugome bwa ba sekuruza,

batazava aho begura umutwe bakigarurira isi,

bityo bakayubakaho imijyi.

Imana izarimbura Babiloni

22 Uhoraho Nyiringabo aravuze ati: “Nzahagurukira Abanyababiloniya, ntsembe Babiloni n’ibiyirimo byose, abayikomokamo n’urubyaro rwabo.

23 Nzayihindura igishanga ibe icyanya cy’ibiyongoyongo, nzayikubura n’umweyo utsemba.” Ni ko Uhoraho Nyiringabo avuze.

Ubukandamizwe bwose buzashira

24 Uhoraho Nyiringabo ararahiye ati:

“Ibyo nateganyije nzabisohoza,

ibyo nagambiriye ni byo bizabaho.

25 Nzajanjagurira Abanyashūru mu gihugu cyanjye,

nzabaribatira hejuru y’imisozi yanjye.

Nzakiza ubwoko bwanjye bakandamizaga,

nzabutura umutwaro babikorezaga.”

26 Uyu ni umugambi Uhoraho yafatiye isi yose,

ni igihano yahanishije amahanga yose.

27 None se niba Uhoraho Nyiringabo yabigambiriye,

ni nde wamuvuguruza?

Mbese niba yiyemeje guhana,

ni nde wamubuza?

Uhoraho aburira Abafilisiti

28 Ubu butumwa bwatanzwe mu mwaka Umwami Ahazi yapfuyemo.

29 Bafilisiti mwese, ntimwishimire ko inkoni yabakubitaga yavunitse,

mu mwiyuburure w’inzoka hazavukamo impiri,

mu igi ryayo hazavamo ikiyoka cy’ubumara.

30 Abatindi nyakujya bazabona ibyokurya,

abakene bazagira umutekano,

nyamara urubyaro rwanyu nzarwicisha inzara,

nta n’umwe uzayirokoka.

31 Mwa mijyi ntamenwa mwe, nimurire muboroge,

Abafilisiti bacitse intege,

dore igitero giturutse mu majyaruguru,

nta n’umwe wabuze muri bo.

32 Bazasubiza iki intumwa z’Abafilisiti?

Bazazisubiza bati:

“Uhoraho ni we washinze Siyoni,

ni yo abakene bo mu bwoko bwe bafitemo ubuhungiro.”

Amakuba ya Mowabu

1 Ubu ni ubutumwa bwagenewe Mowabu.

Ari na Kiri, ya mijyi yo muri Mowabu yaratsembwe,

yatsembwe mu ijoro rimwe.

2 Abaturage b’i Diboni bagiye mu ngoro yabo,

bagiye kuririra ahasengerwa,

ab’i Mowabu baraborogera i Nebo n’i Medeba,

bimoje umusatsi n’ubwanwa.

3 Mu mayira abantu bambaye imyambaro igaragaza akababaro,

baraborogera hejuru y’amazu no mu bibuga,

abantu bose bitura hasi barira.

4 Ab’i Heshiboni n’i Eleyale barataka,

imiborogo yabo irumvikana kugera i Yahasi,

ingabo za Mowabu na zo zirataka,

zakutse umutima.

5 Ndaririra Mowabu,

dore abantu bayo bahungiye i Sowari n’i Egilati-Shelishiya,

barazamuka barira bagana i Luhiti,

mu nzira igana i Horonayimu bashavujwe n’ayo makuba.

6 Amazi y’i Nimurimu yarakamye,

ibyatsi byarumye ntakikihamera,

nta kimera kikiharangwa.

7 Umutungo bari basigaranye,

bawambukanye hakurya mu biti byo ku nkombe y’umugezi.

8 Imiborogo ni yose mu mpande zose z’igihugu cya Mowabu,

amaganya yabo arumvikana i Egilayimu n’i Bēri-Elimu.

9 Amazi y’i Diboni yuzuyemo amaraso,

nyamara Uhoraho aravuze ati:

“Ab’i Diboni nzabongerera ibyago,

abacitse ku icumu b’i Mowabu bazaribwa n’intare.”

Muwabu yitabaza Yeruzalemu

1 Nimwoherereze umwami abana b’intama,

muzohereze zive i Sela zinyuze mu butayu,

zigere ku musozi wa Siyoni.

2 Abamowabukazi barabuyera ku byambu bya Arunoni,

bameze nk’inyoni zibuyera zirukanywe mu byari byazo.

3 Abamowabu baratakambira ab’i Yeruzalemu bati:

“Nimutugire inama mufate icyemezo,

nimuduhishe nk’uko ijoro ripfukirana amanywa,

nimuduhishe turi ibicibwa,

ntimutererane impunzi.

4 Nimureke impunzi z’Abamowabu zihungire iwanyu,

nimuzihungishe umurimbuzi.

Amaherezo igitugu n’urugomo bizarangira,

ubusahuzi na bwo buzashira mu gihugu.

5 Icyo gihe ukomoka kuri Dawidi azaba umwami,

azategekesha abantu urukundo n’umurava,

azashishikarira gukora ibitunganye,

azaca imanza zitabera.”

Ab’i Yeruzalemu bararirira Mowabu

6 Ab’i Yeruzalemu baravuga bati:

“Twumvise bavuga ubwirasi bukabije bw’Abamowabu,

twumvise bavuga ubwibone bwabo n’agasuzuguro kabo,

twumvise bavuga ukwishyira hejuru kwabo kutagira umumaro.”

7 None Abamowabu bose bararirira igihugu cyabo,

baraboroga bashavuye,

baribuka ibyokurya byiza bariraga i Kiri-Heresi.

8 Imirima y’i Heshiboni yarangiritse,

imizabibu y’i Sibuma yararabiranye,

ni yo yengwagamo divayi yasindishaga abategetsi b’ibihugu.

Iyo mizabibu yageraga i Yāzeri no ku butayu,

yari yaragabye amashami hakurya y’ikiyaga cy’Umunyu.

9 Ni yo mpamvu twifatanyije n’ab’i Yāzeri,

turaririra imizabibu y’i Sibuma,

turaririra ab’i Heshiboni n’ab’i Eleyale,

koko umusaruro wabo ntuzongera kubanezeza.

10 Imirima yanyu ntikibatera kunezerwa,

mu mizabibu yanyu ntihacyumvikana urwamo rw’ibyishimo.

Imivure yanyu ntikirangwamo divayi,

indirimbo z’ibyishimo zararangiye.

11 Ni yo mpamvu ncurangira Mowabu indirimbo y’amaganya,

ndaboroga kubera Kiri-Heresi.

12 Abamowabu bazajya ahasengerwa,

bazajya mu ngoro gutakambira imana zabo,

nyamara nta cyo bizabamarira.

13 Ibyo ni byo Uhoraho yavuze kuri Mowabu kuva kera. None Uhoraho aravuze ati:

14 “Mu myaka itatu itarengaho umunsi n’umwe, abanyacyubahiro b’i Mowabu na rubanda bazasigara ari mbarwa, n’abazacika ku icumu nta cyo bazimarira.”

Iherezo ry’ubutegetsi bw’i Damasi n’ubwa Isiraheli

1 Ubu ni ubutumwa bwagenewe Damasi.

Dore Damasi ntizongera kuba umujyi ukundi,

izahinduka amatongo.

2 Imijyi yo muri Aroweri izahinduka umusaka,

amatungo azayibyagiramo nta cyo yikanga.

3 Abisiraheli ntibazongera kugira imijyi ntamenwa,

ubutegetsi bw’i Damasi buzarangira.

Abanyasiriya bazacika ku icumu bazacishwa bugufi,

bazacishwa bugufi bamere nk’Abisiraheli.

Uko ni ko Uhoraho Nyiringabo avuze.

4 Icyo gihe Abisiraheli bazatakaza icyubahiro cyabo,

ubukungu bwabo buzashira.

5 Isiraheli izamera nk’ingano zirundanyijwe igihe cy’isarura,

izaba nk’igihe umusaruzi agesa amahundo yazo,

izamera nk’ingano bahumbahumba mu kibaya cy’Abarefa.

6 Muri Isiraheli hazarokoka abantu mbarwa,

izaba nk’igiti cy’umunzenze cyasaruweho imbuto zose,

izaba nk’igiti cyasigayeho imbuto ebyiri cyangwa eshatu mu bushorishori,

izaba nk’igiti cyasigayeho imbuto nkeya ku mashami yo hasi.

Uko ni ko Uhoraho Imana ya Isiraheli avuze.

7 Icyo gihe abantu bazarangamira Umuremyi wabo, bazahindukirira Umuziranenge wa Isiraheli.

8 Ntibazongera kwita ku ntambiro biyubakiye, ntibazongera kurangamira inkingi zeguriwe Ashera cyangwa intambiro zoserezwaho imibavu, biyubakiye.

9 Icyo gihe imijyi ntamenwa baretse kubera Abisiraheli izahinduka ibihuru n’ishyamba. Koko iyo mijyi izahinduka amatongo.

10 Isiraheli we, koko wibagiwe Imana Umukiza wawe,

ntiwazirikanye Urutare ntamenwa rwo buhungiro bwawe!

Bityo wihingiye imirima myiza,

wabibye imbuto z’abanyamahanga.

11 Imbuto mwabibye mwazimejeje uwo munsi,

mwazibibye mu gitondo zihita zizana indabyo.

Nyamara nta cyo muzasarura,

ahubwo hazabaho igihe cy’amakuba n’umubabaro ukabije.

Iterabwoba ry’amahanga

12 Mbega uburakari bw’abantu benshi!

Bararuruma nk’inyanja irimo imihengeri.

Mbega umuborogo w’amahanga!

Bararuruma nk’amazi menshi.

13 Umva uburyo ibihugu biruruma nk’amazi y’inyanja,

nyamara Uhoraho azabicyaha bihungire kure,

bizaba nk’umurama utumuka hejuru y’imisozi,

bizaba nk’umukungugu utumuwe na serwakira.

14 Ku mugoroba biba biteye ubwoba,

nyamara mu rukerera bikayoyoka.

Ngayo amaherezo y’abatwambura ibyacu,

ni yo maherezo y’abadusahura.

Imiburo ku Banyakushi

1 Uragowe wa gihugu we cyuzuyemo inzige,

igihugu kiri hakurya y’inzuzi z’i Kushi.

2 Ni igihugu cyohereza intumwa zinyuze mu nyanja,

zambuka zikoresheje amato aboshywe mu mfunzo.

Barazibwira bati: “Nimugende mwa ntumwa mwe,

nimwihute mujye mu gihugu cy’abantu b’intwari.

Ni abantu barebare b’umubiri unogereye,

ni abantu batinyitse ku isi yose,

barakomeye kandi bakandamiza andi moko,

igihugu cyabo cyambukiranyijwe n’inzuzi.”

3 Yemwe bantu mwese mutuye isi,

igihe muzabona ibendera rishinzwe hejuru y’imisozi, muzaryitegereze,

igihe muzumva ihembe rivuze muzatege amatwi.

4 Koko Uhoraho yarambwiye ati:

“Nzatuza mbyitegerereze aho ntuye,

nzaba meze nk’ubushyuhe igihe cy’izuba,

nzaba meze nk’ibicu bibuditse igihe cy’isarura.”

5 Mbere y’isarura imizabibu ibanza kurabya,

ururabyo ruvamo imbuto zigahisha,

amaseri y’izo mbuto bazayatemesha umuhoro,

amashami y’imburamumaro na yo azatemwa.

6 Ibyo byose bizagabizwa ibisiga n’inyamaswa byo mu gasozi,

ibisiga bizahamara impeshyi yose,

inyamaswa na zo zizahamara itumba.

7 Icyo gihe bazazanira amaturo Uhoraho Nyirububasha, bayavanye kuri ba bantu barebare bafite umubiri unogereye, ba bantu batinywa n’isi yose bagakandamiza andi moko, kandi igihugu cyabo kikambukiranywa n’inzuzi. Ayo maturo bazayazana kuri Siyoni, ari ho Uhoraho Nyiringabo azahimbarizwa.

Abanyamisiri bakuka umutima

1 Ubu ni ubutumwa bwagenewe Misiri.

Dore Uhoraho agiye mu Misiri,

aragendera ku gicu cyihuta cyane,

ibigirwamana byo mu Misiri birahinda umushyitsi imbere ye,

Abanyamisiri bacitse intege.

2 Uhoraho aravuga ati:

“Ngiye kubateranya basubiranemo,

umuvandimwe azarwanya uwo bava inda imwe,

incuti na zo zizarwana.

Umujyi uzarwanya undi mujyi,

igihugu kizatera ikindi.

3 Abanyamisiri bazakuka umutima,

imigambi yabo nzayihindura ubusa.

Bazagisha inama ibigirwamana byabo,

bazagisha inama abazimu n’abashitsi n’abapfumu.

4 Abanyamisiri nzabagabiza abategetsi b’inkazi,

bazategekwa n’umwami ubakandamiza.”

Uko ni ko Nyagasani Uhoraho Nyiringabo avuze.

5 Amazi ya Nili azakama,

urwo ruzi ruzahinduka umusenyi.

6 Imigende yarwo izaba umunuko,

imigezi yo mu Misiri izakama,

imbingo n’imfunzo bizumirana.

7 Imirima yose yuhirwaga n’uruzi rwa Nili izakakara,

izakuburwa n’umuyaga nta kizasigara.

8 Abarobaga muri Nili bose bazaganya barire,

abarobeshaga ururobo bazijujuta,

abarobeshaga imitego bazagira agahinda.

9 Ababoshyi b’imyenda bazacika intege,

abagabo n’abagore baboha imyenda yera na bo bazumirwa.

10 Koko ababoshyi b’imyenda bazashoberwa,

ababeshwagaho n’uwo mwuga bazashavura.

11 Abategetsi b’i Sowanini abapfapfa,

abajyanama b’ibwami batanga inama z’imburamumaro.

Ni nde ushobora kubwira umwami ati:

“Ndi impuguke nkomoka ku bami ba kera?”

12 Mwami wa Misiri, za mpuguke zawe ziri he?

Ngaho nizikumenyeshe icyo Uhoraho Nyiringabo yagambiriye,

nizikumenyeshe imigambi ye ku gihugu cya Misiri.

13 Abategetsi ba Sowani ni abapfapfa,

abategetsi ba Memfisi na bo barajijwe,

abo batware ni bo bagomba kuyobora igihugu,

nyamara barakiyobeje.

14 Uhoraho yayobeje imigambi yabo,

koko rero bayobeje Abanyamisiri mu byo bakora byose,

bityo babaye nk’abasinzi bigaragura mu birutsi.

15 Nta n’umwe mu Misiri ushobora kugira icyo amara, yaba umukire cyangwa umukene, yaba uw’ingenzi cyangwa uw’inyuma y’abandi.

Uko Misiri izamera

16 Igihe kimwe Abanyamisiri bazaba nk’abagore, bazagira ubwoba bahinde umushyitsi nibabona Uhoraho Nyiringabo abarwanya.

17 Abayuda bazatera ubwoba Abanyamisiri, buri wese uzumva bavuga iby’Abayuda azagira ubwoba, kuko Uhoraho Nyiringabo agambiriye kubarwanya.

18 Icyo gihe imijyi itanu yo mu Misiri izavuga igiheburayi, bityo bemere kwifatanya n’Uhoraho Nyiringabo. Umwe muri iyo mijyi uzitwa “Umujyi w’izuba”.

19 Icyo gihe mu Misiri rwagati hazubakwa urutambiro rw’Uhoraho, n’inkingi yeguriwe Uhoraho ahagana ku mupaka.

20 Ibyo bizaba ikimenyetso n’ubuhamya ko Uhoraho Nyiringabo ari mu gihugu cya Misiri. Igihe Abanyamisiri bazatabaza Uhoraho kubera ababakandamiza, azaboherereza umukiza uzabatabara, ababohore.

21 Uhoraho azimenyesha Abanyamisiri, bityo na bo bazamumenya. Bazamutura ibitambo n’amaturo, bagirane amasezerano na we kandi bayakomeze.

22 Uhoraho azahana Abanyamisiri abateze indwara, ariko hanyuma azabakiza. Ubwo bazamugarukira, abababarire kandi abakize.

23 Icyo gihe hazaboneka inzira ihuza Misiri na Ashūru. Abanyashūru bazagenderera Abanyamisiri, n’Abanyamisiri bagenderere Abanyashūru. Abatuye ibyo bihugu byombi bazasengera hamwe.

24 Icyo gihe nikigera, Isiraheli izaba iya gatatu kuri Misiri na Ashūru. Ibyo bihugu uko ari bitatu bizahesha isi yose umugisha.

25 Uhoraho Nyiringabo azabaha umugisha avuga ati: “Mpaye umugisha abantu banjye b’Abanyamisiri, nywuhaye n’Abanyashūru niremeye, n’Abisiraheli umwihariko wanjye.”

Ezayi agenda yambaye ubusa

1 Hari mu mwaka umugaba mukuru w’ingabo yoherejwe na Sarugoni umwami wa Ashūru, atera Ashidodi arayigarurira.

2 Muri icyo gihe Uhoraho yari yarabwiye Ezayi mwene Amotsi ati: “Genda wiyambure imyambaro igaragaza akababaro, wiyambure n’inkweto zawe.” Ezayi yumvira Uhoraho, agenda yambaye ubusa nta n’inkweto.

3 Nuko Uhoraho aravuga ati: “Nk’uko umugaragu wanjye Ezayi amaze imyaka itatu agenda yambaye ubusa nta n’inkweto, icyo kikaba ari ikimenyetso n’imiburo y’ibizaba kuri Misiri na Kushi,

4 ni na ko Umwami wa Ashūru azajyana Abanyamisiri n’Abanyakushi ho iminyago, abasore n’abasaza bambaye ubusa nta n’inkweto, n’amatako yabo yanamye maze Misiri ikorwe n’isoni.

5 Abiringiraga Kushi bakiratana Misiri, bazacika intege kandi bakorwe n’isoni.”

6 Icyo gihe abaturage baturanye n’ibyo bihugu bazavuga bati: “Dore ibyabaye ku bo twishingikirizagaho, tubahungiraho ngo badutabare kandi badukize umwami wa Ashūru. Ese noneho tuzagana he?”