1 Nuko Biludadi w’Umushuwa aravuga ati:
2 “Imana ni yo nyir’ububasha n’igitinyiro,
ni yo ituma amahoro aganza mu ijuru.
3 Ni nde wabasha kubarura imitwe y’ingabo zayo?
Ni nde umucyo w’Imana utamurikira?
4 Mbese umuntu yabasha gutunganira Imana?
Ese umuntu buntu yabasha ate kuba umwere?
5 Mbese niba Imana ibona ukwezi kudacyeye,
ese niba ibona inyenyeri zitera de,
6 kuri mwene muntu hacura iki,
mwene muntu umeze nk’urunyo n’umunyorogoto?”
1 Nuko Yobu arabasubiza ati:
2 “Mbega ngo uratera inkunga umunyantegenke!
Mbega ngo uragoboka utishoboye!
3 Mbega ngo uragira inama ikiburabwenge!
Mbega ngo urangaragariza ubushishozi buhambaye!
4 Mbese ayo magambo yose urayabwira nde?
Ni nde wakoheje kuvuga utyo?
5 Abapfuye barahindira umushyitsi ikuzimu,
amazi n’ibiyabamo biradagadwa.
6 Imana ireba ibiri ikuzimu,
aho ikuzimu ntihihisha amaso yayo.
7 Ni yo yahanitse ikirere,
ni yo yatendetse isi ku busa busa.
8 Amazi iyabumbira mu bicu bibuditse,
nyamara nubwo biremereye ntibihanuka.
9 Itwikira ukwezi,
igutwikiriza ibicu byayo.
10 Ishyiraho ikirere cy’urugabano hejuru y’amazi,
urugabano rutandukanya umucyo n’umwijima.
11 Imana itigisa inkingi z’ijuru,
irazitigisa zigakangarana.
12 Ububasha bwayo bwatumye icubya inyanja,
ubwenge bwayo bwatumye irimbura Rahabe.
13 Umwuka wayo wakenkemuye ijuru,
ubwayo yivuganye cya gikōkokabutindi.
14 Niba ibi yakoze bidahambaye kuri yo,
ibyo twe dushobora kumenya ni bike cyane.
Ese ubwo ni nde wasobanukirwa n’ububasha bwayo?”
1 Nuko Yobu yongera gufata ijambo aravuga ati:
2 “Ndahiye Imana yanze kundenganura,
ndahiye Nyirububasha unshavuza,
3 igihe cyose ngihumeka,
igihe cyose Imana ikimpaye umwuka,
4 sinzigera ngira ikibi mvuga,
nta n’ubwo nzigera mbeshya.
5 Sinshobora kwemera na rimwe ko muvuga ukuri,
nzarinda nipfira nkivuga ko ndi umwere.
6 Nzakomeza kuba intungane sinzabireka,
igihe cyose nkiriho ntacyo nishinja.
7 Unyanga azapfe urw’abagome,
umpagurukiye apfe urw’inkozi z’ibibi.
8 Umuhakanamana agira cyizere ki?
Agira cyizere ki iyo yambuwe ubuzima bwe?
9 Dore amakuba azamwugariza,
mbese namwugariza Imana izumva gutakamba kwe?
10 Umuntu nk’uwo ntiyakwishimira Nyirububasha,
ntiyata igihe cye atakambira Imana.
11 Jyewe nzabamenyesha ububasha bw’Imana,
sinzabahisha imigambi ya Nyirububasha.
12 Erega namwe mwese mwarabyiboneye!
None se ni iki gituma muvuga amagambo y’amahomvu?
13 Dore ibihembo Imana igenera umugome,
dore igihano Nyirububasha agenera abanyagitugu:
14 abana abyara bazicwa n’inkota,
abamukomokaho bazicwa n’inzara.
15 Abe barokotse bazatsembwa n’icyorezo,
abapfakazi babo ntibazabaririra.
16 Nubwo yarunda ifeza nyinshi,
nubwo yarunda imyambaro,
17 iyo myambaro izambarwa n’intungane,
ifeza na yo izajyanwa n’abere.
18 Inzu y’umugome idigadiga nk’iy’igitagangurirwa,
idigadiga nk’akaruri k’umurinzi w’umurima.
19 Aryama akungahaye akabyuka atindahaye,
iyo akangutse asanga ibyo atunze byashizeho.
20 Ibitera ubwoba bimwisukiranyaho nk’amazi,
nijoro serwakira ikamwamurukana.
21 Umuyaga w’iburasirazuba uramutwara,
uramutumukana akava aho yari atuye.
22 Umuyaga umutumura nta mpuhwe,
ntabwo abasha guhunga ubukana bwawo.
23 Ababonye ibimubayeho baramukwena,
aho agannye hose bamuha urw’amenyo”.
1 “Ifeza igira aho icukurwa,
izahabu na yo igira aho itunganyirizwa.
2 Ubutare bucukurwa mu butaka,
ibuye rishongeshejwe rivamo umuringa.
3 Mu binombe byijimye abacukuzi bajyanamo amatara,
baracukura bakagera ku rutare ruri ahijimye.
4 Bacukura ibinombe birebire kure y’aho abantu batuye,
baracukura kugera aho abagenzi batagera,
bacukura bagendera ku migozi ibakoza hirya no hino.
5 Ubutaka ni bwo bwera ibyokurya,
naho munsi yabwo haribirindura nk’ahatwitswe n’umuriro.
6 Amabuye yaho abonekamo ibuye ryitwa safiri,
umukungugu waho ubonekamo izahabu.
7 Aho ubwo butare buva na za kagoma ntizigerayo,
yewe n’inkongoro ntizigeze ziharabukwa.
8 Inyamaswa z’inkazi ntizihagera,
ndetse n’intare ntizihazi.
9 Umuntu amenagura urutare rw’isarabwayi,
umuntu arimbura imisozi ayihereye mu imerero ryayo.
10 Aca ibyuho mu rutare,
abonamo amabuye y’agaciro.
11 Baracukura bakagera ku masōko,
amabuye yari yihishe akajya ahagaragara.
12 Ariko se ubwenge bwaboneka he?
Mbese isōko y’ubuhanga yo iboneka he?
13 Nta muntu n’umwe uzi agaciro kabwo,
ntibujya buboneka kuri iyi si.
14 Ikuzimu haragira hati: ‘Ntabundimo’,
inyanja na yo iragira iti: ‘Ntabubarizwa iwanjye’.
15 Ntabwo buguranwa izahabu,
nta n’ubwo buguranwa ifeza.
16 Nta wabugereranya n’izahabu nziza cyane,
nta n’uwabugereranya n’amabuye y’agaciro.
17 Ntibuhwanyije agaciro n’izahabu cyangwa ikirahuri,
ntawabugurana igikombe cy’izahabu nziza cyane.
18 Ntawabugereranya n’amabuye y’agaciro ayo ari yo yose,
agaciro k’ubwo bwenge ni ak’amasaro y’agahebuzo.
19 Ntawabugereranya n’ibuye rya topazi ry’i Kushi,
busumbije agaciro izahabu yatunganyijwe.
20 Noneho se ubwenge bukomoka he?
Mbese isōko y’ubuhanga yo ni iyihe?
21 Dore buhishwe amaso y’umuntu wese,
inyoni na zo ntizibuzi.
22 Kirimbuzi na Rupfu na byo biti:
‘Twumvise bavuga iby’ubwo bwenge’.
23 Imana izi inzira ibuganaho,
ni yo yonyine izi aho buba.
24 Ireba hose no ku mpera z’isi,
igenzura ibiba munsi y’ijuru byose.
25 Igihe yashyiragaho uburemere bw’umuyaga,
igihe yapimaga amazi yashyize ku isi,
26 igihe yashyiragaho itegeko rigenga imvura,
igihe yashyiragaho inzira y’inkuba,
27 ni bwo yabonye ubwo bwenge ibuha agaciro,
yarabucengeye irabwemeza.
28 Imana ibwira umuntu iti:
‘Kubaha Uhoraho ni bwo bwenge,
kuzibukira ibyaha ni ko kujijuka.’ ”
1 Yobu akomeza kuvuga ati:
2 “Icyampa ngasubirana imibereho nigeze,
icyampa ngasubirana cya gihe Imana yari ikinyitayeho.
3 Icyo gihe urumuri rwayo rwandasiragaho,
umucyo wayo wamurikiraga mu mwijima.
4 Icyampa ngasubirana imbaraga nahoranye,
izo nahoranye Imana ikiri incuti y’urugo rwanjye,
5 igihe Nyirububasha yari akiri kumwe nanjye,
igihe nari nkikijwe n’abana banjye.
6 Icyo gihe nari naradamaraye,
amavuta y’iminzenze yabarizwaga iwanjye.
7 Iyo najyaga mu nama y’abakuru b’umujyi,
nicaranaga na bo ku karubanda,
8 abasore barambonaga bakambererekera,
abasaza na bo barahagurukaga bakampa icyubahiro.
9 Abatware bahagarikaga ibiganiro byabo,
bahagarikaga ibiganiro bagaceceka.
10 Abategetsi na bo baracecekaga,
bararucaga bakarumira.
11 Abanyumvaga bose banyitaga umunyehirwe,
abambonaga na bo barabihamyaga.
12 Koko nagobokaga umukene untakambiye,
nagobokaga n’impfubyi itagira kivurira.
13 Ababaga bagiye gupfa banyifurizaga umugisha,
umupfakazi natumaga yishima.
14 Nambaraga ubutungane bukanyizihira,
nambaraga ubutabera nk’ikanzu n’ingofero.
15 Impumyi narayirandataga,
ibirema na byo narabisindagizaga.
16 Abakene nababereye nk’umubyeyi,
abanyamahanga narabarengeraga.
17 Abagizi ba nabi nabamenaga urwasaya,
nabavutsaga abo bari bāsamiye.
18 Najyaga nibwira nti: ‘Nzapfira iwanjye,
nibwiraga ko nzisazira maze imyaka itabarika,
19 nibwiraga ko nzamera nk’igiti gitewe hafi y’amazi,
igiti gitondwaho n’ikime mu mashami yacyo.
20 Ikuzo ryanjye rizahorana itoto,
imbaraga zanjye zizaba nk’iz’umuheto ureze.’
21 Icyo gihe abantu banyumvaga bafite amatsiko,
baratuzaga bakumva inama mbagira.
22 Nta wagiraga icyo yongera ku ijambo ryanjye,
ijambo ryanjye ryarabanyuraga bose.
23 Bantegerezaga nk’abategereje imvura,
bantegerezaga nk’abategereje imvura y’itumba.
24 Iyo nabarebanaga ineza baratangaraga,
bityo babonaga mfite impuhwe.
25 Nabayoboraga inzira mbarangaje imbere,
nabanaga na bo nk’umwami uganje mu ngabo ze,
nabahumurizaga nk’uhumuriza abanyamubabaro.”
1 “Nyamara ubu abato kuri jye bangize urw’amenyo,
ba bandi nabonaga ba se ari nk’imbwa zirinda umukumbi wanjye.
2 Erega n’ubundi nta cyo bari kumarira,
nta mbaraga bigiriraga bari ba nyakwigendera!
3 Bari barazahajwe n’ubukene n’inzara,
bajyaga mu bigunda gushakirayo ibyo barya,
babishakiraga mu gasozi nijoro.
4 Basoromaga ibibabi by’ibihuru,
basekuraga n’inguri bakazirya.
5 Bari barabaye ibicibwa mu bantu,
bavugirizwaga induru nk’ibisambo.
6 Biberaga mu mikokwe,
biberaga mu buvumo no mu masenga.
7 Bahūmiraga mu biti,
bagerekeranaga mu bihuru by’amahwa.
8 Bari imburamumaro batagira inkomoko,
bari ibicibwa mu gihugu.
9 None ubu basigaye bankwena,
bangize iciro ry’imigani.
10 Baranyitarura kuko mbatera ishozi,
ntibagira isoni zo kuncira mu maso.
11 Erega Imana yarancogoje inancisha bugufi,
bityo abambonye bakambonerana!
12 Abagome barampagurukiye kugira ngo banshinje,
bashakashaka uburyo bwo kuntembagaza,
bashakisha uburyo bwo kundimbura.
13 Barantangatanze singira aho mpungira,
bashakashaka icyampitana,
ntawe ubakoma imbere.
14 Baca icyuho bakanyuramo,
baza babyiganira kunsumira.
15 Ubwoba bwarantashye,
icyubahiro cyanjye cyagiye nk’umuyaga,
ihirwe ryanjye ryayoyotse nk’igicu.
16 None amagara arimo arancika,
iminsi y’umubabaro iranyokamye.
17 Nijoro amagufwa arara anguguna,
uburibwe bumūnga ntibucogora.
18 Imana yanshikuje umwambaro wanjye,
yawunigishije mu ijosi.
19 Yantuye mu cyondo,
nahindutse umukungugu n’ivu.
20 Mana, ndagutakambira ariko ntunsubiza,
ndakwiyereka ariko ntunyitaho.
21 Dore wambereye umugome,
untoteza n’imbaraga zawe zose!
22 Unteza umuyaga ukangurukana,
unteza serwakira ikankoza hirya no hino.
23 Nzi neza ko unshyira urupfu,
unjyana aho abantu bose bazajya.
24 Kuki ukurikirana umukene ugutakambira,
kuki ugutakambira umurekera mu kaga?
25 Mbese sinaririraga abari mu kaga?
Ese sinagiriraga abakene impuhwe?
26 Nari nizeye umunezero ngwirirwa n’ibyago,
nari ntegereje umucyo ngwirirwa n’umwijima.
27 Umutima wanjye uradiha ubutitsa,
iminsi y’umubabaro iranyugarije.
28 Ngendana umubabaro ntihagire umpumuriza,
no mu ruhame ndahaguruka ngatabaza.
29 Nabaye ruhabwanduru nka nyiramuhari,
nibanira na za mbuni nigunze.
30 Umubiri wanjye warijimye numva unyomokaho,
numva umubiri wanjye uhinda umuriro.
31 Inanga yanjye yahindutse iy’amaganya,
umwironge wanjye wahindutse uw’amarira.”
1 “Niyemeje kutarangamira inkumi,
nabyiyemeje mbikuye ku mutima.
2 Ni ayahe maherezo abantu bagenerwa n’Imana?
Ni uwuhe munani mu ijuru duteze kuri Nyirububasha?
3 Abagome abateganyiriza kurimbuka,
ese inkozi z’ibibi ntaziteza amakuba?
4 Imana izi imigenzereze yanjye,
izi n’aho njya hose.
5 Mu mibereho yanjye sinigeze mbeshya,
mu migenzereze yanjye sinigeze ndyarya.
6 Ngaho Imana nimpimishe umunzani utunganye,
bityo irasanga ndi inyangamugayo.
7 Niba narateshutse inzira yanyeretse,
niba narararuwe n’ibyo mbona,
niba hari ikibi ubwanjye nakoze,
8 icyo nzajya mbiba rubanda rujye rwisarurira,
imyaka yanjye ijye itsembwa mu butaka.
9 Niba narigeze ndarikira umugore w’undi,
niba naratitirije iwe ku muryango,
10 umugore wanjye azacyurwe n’undi,
azaryamane n’abandi bagabo.
11 Koko rero iryo ryaba ari ishyano,
cyaba ari icyaha nkwiye guhanirwa.
12 Icyo cyaha cyambera nk’umuriro ukongora,
umuriro warimbura n’ibyanjye byose.
13 Niba narakandamije umugaragu wanjye cyangwa umuja wanjye,
niba ntarabarenganuye bagire icyo bandega.
14 Nabigenza nte Imana impagurukiye?
Nayisubiza iki iramutse ibimbajije?
15 None se Imana yandemye si yo yabaremye?
Erega Imana yaturemye ni imwe!
16 Sinigeze nima umukene icyo ansabye,
sinigeze ntuma umupfakazi yiheba.
17 Sinigeze niharira ibyokurya,
sinabyihariye ngo nime impfubyi.
18 Nazibereye nk’umubyeyi kuva mu buto bwanjye,
narengeye abapfakazi kuva nkivuka.
19 Ntabwo naretse umukene ngo abure icyo yambara,
nta n’ubwo naretse umutindi nyakujya ngo abure icyo yiyorosa.
20 Bagiye banshimira ko nabambitse,
banshimiye ko mbasusurukije, mbahaye imyenda iboshywe mu bwoya bw’intama zanjye.
21 Niba naragiriye nabi impfubyi,
niba narayirengagije nishingikirije abacamanza,
22 urutugu rwanjye ruhwanyuke,
ukuboko kwanjye gukonyokere mu nkokora.
23 Koko rero igihano cy’Imana cyanteraga ubwoba,
ikuzo ryayo ryambuzaga gucumura bene ako kageni.
24 Sinigeze nishingikiriza ku izahabu,
nta n’ubwo nigeze niringira izahabu inoze.
25 Sinigeze nirata umutungo wanjye mwinshi,
nta n’ubwo nishimiye ubwinshi bw’ibyo nari ntunze.
26 Sinigeze ndamya izuba rirabagirana,
sinigeze ndamya ukwezi kugenda gushashagira.
27 Ntibyigeze bindarura ngo mbiramye,
sinigeze mbitegera amaboko ngo mbihe icyubahiro.
28 Byari kumbera icyaha nkwiye guhanirwa,
koko rero nari kuba nihakanye Imana nyir’ijuru.
29 Sinigeze nezezwa n’ibyago by’umwanzi wanjye,
sinigeze nishimira ko yagushije ishyano.
30 Sinigeze ncumura mu magambo,
sinigeze nsabira umwanzi wanjye gupfa.
31 Ni nde mushyitsi ntigeze ngaburira ngo ahage?
Abakozi banjye babihamya.
32 Nta mushyitsi nigeze ndaza hanze,
abacumbitsi bazaga iwanjye bisanga.
33 Sinigeze mpisha ibicumuro byanjye nk’abandi,
sinigeze nzinzika ibyaha mu mutima wanjye.
34 Sinigeze ntinya amagambo ya rubanda,
sinigeze ntinya ab’imiryango ikomeye,
naricecekeye nigumira iwanjye.
35 Icyampa nkagira untega amatwi!
Ngiryo ijambo ryanjye riheruka,
ahasigaye Nyirububasha nansubize.
Ikirego umuburanyi wanjye andega nicyandikwe.
36 Koko rero nzemera ngiheke ku ntugu,
nzagitamiriza nk’ikamba.
37 Nzamurikira Imana ibyo nakoze byose,
nzaba imbere yayo mfite ishema.
38 Niba ubutaka mpinga bwaranyamaganye,
niba n’amayogi yabwo narayababaje,
39 niba narariye umusaruro wabwo ntawurishye,
niba naricishije bene wo inzara,
40 ahagombaga kumera ingano hazamere amahwa,
ahagombaga kumera indi myaka hazamere kimari.”
Nuko Yobu amaze kuvuga atyo arekera aho.
1 Abo bagabo batatu barekera aho kuvugana na Yobu kuko yiyitaga intungane.
2 Nuko ibyo birakaza cyane Elihu mwene Barakeli ukomoka i Buzi, wo mu nzu ya Ramu, arakarira Yobu kubera ko yigira intungane kuruta Imana.
3 Elihu yarakariye kandi na za ncuti eshatu za Yobu, kubera ko zitashoboye kugira icyo zisubiza Yobu nubwo zavugaga ko ari umunyabyaha.
4 Kubera ko Elihu yari muto kuri bagenzi be, yategereje kuvugana na Yobu barangije.
5 Elihu abonye ko ba bagabo batatu batagifite icyo basubiza Yobu, ararakara.
6 Nuko Elihu mwene Barakeli ukomoka i Buzi aravuga ati:
“Jyewe ndacyari muto naho mwe musheshe akanguhe,
ni cyo cyatumye ntinya,
sinahangaye kubatangariza icyo ntekereza.
7 Naribwiye nti: ‘Reka ndeke abakuze bavuge,
reka abasheshe akanguhe batwungure ubwenge.’
8 Koko rero mu muntu wese harimo umwuka,
umwuka wa Nyirububasha utanga ubumenyi.
9 Abakuze si bo banyabwenge bonyine,
abasheshe akanguhe si bo bashishoza bonyine.
10 Ni cyo gituma mbabwira nti: nimuntege amatwi,
mureke mbabwire icyo ntekereza.
11 Dore naretse murabanza muravuga,
igihe mwashakashakaga icyo muvuga,
nateze amatwi ngo numve ibitekerezo byanyu.
12 Nitaye ku magambo yanyu,
nyamara nta wemeje Yobu ikosa rye,
nta n’uwabeshyuje ibyo yavuze.
13 Muramenye rero ntimuvuge muti: ‘Twungutse ubwenge,
nta muntu wamutsinda keretse Imana.’
14 Koko rero Yobu si jye yabwiraga ahubwo ni mwe,
nanjye simusubiza amagambo nk’ayanyu.
15 Dore murumiwe nta cyo musubiza,
amagambo yabashiranye.
16 Mbese ngumye ntegereze ko nta cyo muvuga?
Dore murihagarariye nta cyo musubiza.
17 Ni jye uramukiwe gusubiza,
reka mbabwire icyo ntekereza.
18 Koko rero amagambo arandwaniramo,
ndiyumvamo umuhati wo kuvuga.
19 Amagambo arambyiganiramo nk’inzoga ibira,
arenda kunturitsa nk’inzoga ituritsa ikibindi.
20 Nimureke mvuge maze noroherwe,
nimureke mfate ijambo nsubize.
21 Koko ntawe ndi bubere,
ntawe ndi bubembereze,
22 nta n’uwo ndi bucacure.
Mbigenje ntyo Iyandemye yankuraho.”
1 “Yobu, tega amatwi wumve icyo nkubwira,
tega amatwi wumve amagambo yanjye.
2 Dore niteguye kuvuga ibyo ntekereza,
ururimi rwanjye nirugobodoke ruvuge.
3 Ndavuga amagambo andi ku mutima,
ibyo mvuga ni iby’ukuri.
4 Umwuka w’Imana ni wo wandemye,
umwuka wa Nyirububasha ni wo umbeshaho.
5 Nyomoza niba ubishobora,
kenyera duhangane.
6 Erega imbere y’Imana turi bamwe!
Nanjye naremwe mu mukungugu,
7 ntuntinye ngo uhinde umushyitsi,
ntutekereze ko nshaka kugukandamiza.
8 Nyamara nakwiyumviye uvuga,
numvise ibyo uvuga ugira uti:
9 ‘Jyewe ndaboneye nta cyaha nakoze,
ndi umwere sinacumuye.
10 Nyamara Imana inshakaho urwitwazo,
yamfashe nk’aho ndi umwanzi wayo.
11 Ntituma nishyira ngo nizane,
ihoza ijisho ku cyo nkoze cyose.’
12 Yobu, ibyo uvuga ntibitunganye,
Imana ntiburana n’umuntu kuko imuruta.
13 None se ni kuki uyigisha impaka?
Harya ngo ni uko idasubiza ibyo uyibaza byose?
14 Imana ivuga ikoresheje uburyo bwinshi,
nyamara umuntu ntiyita ku byo ivuga.
15 Ivuganira n’abantu mu nzozi no mu iyerekwa,
ivugana na bo basinziriye cyane,
ivugana na bo baryamye ku mariri yabo.
16 Izibura amatwi y’abantu,
ibaha imiburo ibakangaranya.
17 Bityo ivana abantu mu bikorwa byabo bibi,
ibakuramo ubwirasi,
18 irinda abantu kujya ikuzimu,
irinda abantu kwicwa.
19 Imana ikosorera umuntu mu bubabare bwe,
imuhanisha uburibwe bw’umubiri we,
20 bityo azinukwa ibyokurya,
ntagira ikimuryohera.
21 Arananuka agata isura,
amagufwa ye agasigara yanamye.
22 Koko rero agiye gupfa ashyirwe ikuzimu,
ubuzima bwe bugabijwe abicanyi.
23 Nyamara iyo habonetse umumarayika umugoboka,
iyo habonetse umwe mu bihumbi by’abamarayika,
yibutsa uwo muntu ibyo ashinzwe gukora,
24 amwingingira Imana ayibwira ati:
‘Mukize urupfu namuboneye incungu.’
25 Icyo gihe umubiri we ugarura itoto,
asubirana imbaraga zo mu buto bwe.
26 Nasenga Imana izamwumva,
azayiramya anezerewe,
na yo izamugarurire ubutungane bwe.
27 Azarangurura mu ruhame ati:
‘Naracumuye sinakora ibitunganye,
nyamara Imana yarambabariye,
28 yandinze kujya ikuzimu,
none ndacyari muzima.’
29 Ngibyo ibyo Imana igirira umuntu,
ibimugirira ityo incuro nyinshi.
30 Nguko uko imurinda kujya ikuzimu,
nguko uko imugarurira ubuzima.
31 Yobu, huguka untege amatwi,
tuza maze ureke mvuge.
32 Niba ufite icyo unsubiza,
uvuge kuko nkwifuzaho ukuri.
33 Niba nta cyo uvuga ntega amatwi,
uceceke nkungure ubwenge.”
1 Elihu arakomeza ati:
2 “Mwa banyabwenge mwe, nimwumve ibyo mbabwira,
mwa bahanga mwe, nimubyiteho.
3 Koko ugutwi gusesengura amagambo,
kuyasesengura nk’uko akanwa karobanura ibyokurya.
4 Nimureke dushishoze tumenye igikwiye,
turebere hamwe ikitubereye cyiza.
5 Yobu yivugiye ati: ‘Ndi intungane,
nyamara Imana yanga kundenganura.
6 Nubwo ncisha mu kuri simbura kwitwa umubeshyi,
nubwo ntacumuye yankomerekeje uruguma rwica.’
7 Hari ubwo mwigeze mubona umuntu umeze nka Yobu?
Ahinyura Imana nk’ugotomera amazi,
8 agirana ubucuti n’inkozi z’ibibi,
agirana umugenderano n’abagome.
9 Koko yaravuze ati:
‘Kumvira Imana ntacyo bimaze.’
10 Bantu mushyira mu gaciro, nimunyumve,
ntibibaho, Imana ntiyakora iby’ubugome,
ntibibaho, Nyirububasha ntiyagira nabi.
11 Imana yitura umuntu ibihwanye n’ibyo yakoze,
yitura buri wese ibihwanye n’imigenzereze ye.
12 Ni ukuri Imana ntiyakora iby’ubugome,
koko Nyirububasha ntiyaca urwa kibera.
13 Mbese haba hari undi wamushinze kugenga iyi si?
Ese haba hari undi wamushinze kugenga ibiyiriho byose?
14 Iyaba Imana yisubiragaho,
yakwisubiza umwuka w’ubuzima itanga,
15 bityo ibinyabuzima byose byarimbuka,
umuntu wese yasubira mu mukungugu.
16 Yobu, niba uzi ubwenge wite kuri ibi:
tega amatwi wumve ibyo nkubwira.
17 Mbese uwanga ubutabera yabasha gutegeka?
Mbese wahangara gushinja Imana nyir’ubutungane?
18 Ni yo yonyine ishobora kubwira umwami iti: ‘Nta cyo umaze’,
ishobora kubwira ibikomangoma iti: ‘Muri abagome.’
19 Ntitonesha abatware,
ntiyita ku bakire ngo ibarutishe abakene,
koko bose baremwe na yo.
20 Mu gicuku abantu bapfa amanzaganya,
abantu bagira ubwoba bagapfa,
abanyambaraga bapfa ntawe ubakojeje urutoki.
21 Imana ihoza ijisho ku migenzereze y’abantu,
koko aho banyuze hose iba ibareba.
22 Nta curaburindi ryahisha umunyabyaha,
ntiryamuhisha ngo Imana itamubona.
23 Nta gihe cyihariye Imana yashyiriyeho buri muntu,
nta gihe yashyizeho cyo kumucira urubanza.
24 Ijanjagura ibihangange itabaririje,
imyanya yabo ikayishyiramo abandi.
25 Koko izi neza ibyo bakora,
ibarimbura nijoro ikabajanjagura.
26 Ibahanira mu ruhame kubera ubugome bwabo.
27 Koko rero banze kuyoboka Imana,
birengagije amategeko yayo.
28 Bakandamije abakene batakira Imana,
bityo yumva gutaka kwabo.
29 Mbese itagize icyo ikora ni nde wayinenga?
Ishatse kwihisha ni nde wayibona?
Nyamara yita ku bantu no ku mahanga,
30 ibikora ishaka ko hatagira umugome widegembya,
ibikora ishaka ko hatagira uyobya rubanda.
31 Umuntu aramutse abwiye Imana ati:
‘Ndihannye sinzongera gukora icyaha,
32 ibyo ntabasha gusobanukirwa ujye ubinyigisha,
niba hari ikibi nakoze sinzongera kugikora.’
33 Mbese urabona Imana yabimuhanira?
Ubwo utemera ibyo ihitiremo, si jye uguhitiramo.
Ngaho rero mbwira icyo utekereza.
34 Abantu bazi gushishoza bazambwira,
abanyabwenge banyumva bazavuga bati:
35 ‘Yobu aravuga ibyo atazi,
aravuga amagambo atarimo ubushishozi.’
36 Icyampa ibigeragezo bya Yobu bikiyongera,
koko ibisubizo bye ni nk’iby’inkozi z’ibibi.
37 Icyaha yakoze acyongeyeho kwigomeka,
atumye natwe dushidikanya,
dore akomeje no gutuka Imana.”